Kebaktian Minggu GBKP 23 Juni 2019

Kebaktian GBKP KM 8 - Minggu, 23 Juni 2019

( I KENCA TRINITATIS / UEM )

BAHAN KHOTBAH
Invocatio : Roma 13 : 8

8. Ola kam rutang man ise pe -- seakatan rutang sikeleng-kelenglah sapih-sapih kam. Kalak si erkeleng ate nandangi kalak si deban, ia enggo nehken Undang-undang.

Ogen : Jesaya 11 : 1 – 9 ( Tunggal )

Kerajan si dame
1. Kesusuren Raja Daud bali ras batang kayu si enggo itabah. Tapi bagi tunas si turah i bas tongkehna nari, bage me pe i bas kesusuren Daud nari keke sekalak raja.
2. Kesah TUHAN ringan i bas ia,
mereken pemeteh ras kuasa merentah rayatna.
Ietehna peraten TUHAN, mehamat ia kempaksa,
3. janah keriahenna, e me matuhi TUHAN.
La erpalasken si teridah saja ia ngadili, tah pe erpalasken kai si ibegina;
4. tapi alu bujur irungguina perkara kalak musil,
janah ibelana kalak si tertindas.
Arah perentahna kalak si ersalah iukum,
janah kalak jahat ikernepken.
5. Iperentahna rayatna alu kebujuren ras kebenaren.
6. Serigala ras biri-biri nggeluh ras-ras alu dame,
arimo tultul medem-medem ras anak kambing.
Anak lembu nggagat ras anak singa,
danak-danak si mpermakanisa.
7. Lembu ras beruang ngagat ras-ras,
anak-anakna pe ras medem-medem.
Singa, nggala gagatenna, bali ras lembu.
8. Anak si kitik denga la kena kai pe,
aminna erguro-guro pe ia deherken nipe si erbisa.
9. I Sion, i Deleng si Badia nu Dibata,
lanai lit si ncedai tah pe kejahaten.
Doni enda dem alu pemeteh kerna TUHAN
bali ras lawit dem alu lau.

Khotbah : Johanes 13 : 31 – 35 (Tunggal)

Pedah si mbaru
31. Kenca Judas lawes nina Jesus, “Genduari ipetangkas me kemulian Anak Manusia si isuruh Dibata janah kemulian Dibata pe ipetangkas arah IA.
32. Adi kemulian Dibata ipetangkas arah IA maka Dibata pe mpetangkas kemulian Anak Manusia e i bas diriNa, janah minter me ibahanNa.
33. O anakku, kentisik nari ngenca Aku ras kam. Idaramindu me pagi Aku. Tapi genduari Kukataken man bandu bagi si enggo Kukataken man kalak Jahudi e, ‘Kam labo banci lawes ku inganKu e.’
34. Kubereken man bandu pedah si mbaru, e me: Sikeleng-kelengenlah kam. Bagi Aku enggo engkelengi kam, kam pe min arus sikeleng-kelengen.