Jabu Si Ipasu-Pasu Dibata - Hari Keluarga ( PA Bersama Kategorial ) ( Bahan PA Moria 23 - 29 Juni 2019 )

Bahan PA Moria 23 - 29 Juni 2019

Hari Keluarga ( PA Bersama Kategorial )

Si MAN OGEN : Masmur 112: 1 - 10

Kemalemen ate kalak bujur
1. Pujilah TUHAN!
Malem ate kalak si erkemalangen man TUHAN,
si ermeriah ukur ngikutken perentah-perentahNa.
2. Anak-anakna kalak si erkuasa i negeri,
kesusurenna ipasu-pasu me pagi.
3. Isi jabuna jadi kalak bayak namura,
kebujurenna lit rasa lalap.
4. Man kalak bujur, adil, perkuah dingen perkeleng,
ersinalsal terang i bas si gelap nari.
5. Malem kal ate kalak si melumbar pepinjamken,
dingen bujur i bas kerina urusen.
6. Kalak bujur asa ndigan pe la guling,
ia tetap iinget rasa lalap.
7. La ia mbiar ngaloken berita si la mehuli,
kinitekenna paguh dingen ernalem ia man TUHAN.
8. La ia mbiar dingen la aru atena,
tek ia maka talu kap imbang-imbangna.
9. Melumbar pemerena man kalak si kekurangen,
kinibujurenna lit rasa lalap,
ia ermulia dingen ihamati.
10. Kalak jahat ngidah si e janah gara atena,
erderik ipenna perbahan nembehna atena.
E maka masap me ia, jenari bene pengarapenna.

T E M A : JABU SI IPASU-PASU DIBATA

TUJUN : : Gelah Moria

Ngasup nuriken tempas kemalemen ate i bas jabu
Njadiken kebujuren jadi palas i bas jabu.

METODE PA : Sharing ras Aksi

Kata Penaruh.
Nggeluh si benar eme kalak si nggeluh i bas kebadian Dibata. Tanda-tanda kalak si nggeluh i bas kebenaren ngasup nulak erbage-bage perbahanen si la payo si lit i tengah-tengah masyarakat. Guna mpertahanken kegeluhen si benar megati kita iperhadapken ku bas erbage-bage perbeben tapi enda me kayu persilangta si arus ipertahanken erkiteken kita enggo ibenarken Jesus Kristus. Erga si arus igalari e erbahansa kita bagi iserapken i bas lingkungenta, i bas ingan erdahin. Enda me perjuangen si terus-menerus selaku kalak si tek man Tuhan Jesus. Arah Masmur 112 enda itegasken maka labo lit rugina adi kita nggeluh i bas kebenaren Dibata ( erkemalangen man Tuhan ) tapi mereken keuntungen si luar biasa sabap keuntungen e la saja si nanami i bas kegeluhen si pepagi tapi genduari e pe. La seh geluhta saja tapi pe seh ku anak kempunta.

Mpebagesi Pengangkan Kerna Ogen
Jabu si kuga kin si ipasu-pasu Dibata ras si ermalem ate? I bas ayat 1, alu tegas ngataken maka jabu si ipasu-pasu Dibata eme jabu si erkemalangen man Dibata. Erkemalangen man Dibata ertina nggeluh alu dem kepatuhen ras kalak si tuhu-tuhu ertedeh ate nandangi kebenaren ( kebadian ) Dibata. Meriah ras malem kal atena adi ia banci nggeluh i bas perentah Dibata ("..yang sangat suka kepada segala perintahNya"). Lit 3 ulih si ijanjiken Dibata man kalak si tuhu-tuhu ertedeh ate nandangi kebenaren Kata Dibata eme:

Ayat 2, 3 anak ras kempuna ngaloken pasu-pasu subuk kebayaken bage pe kiniteken. Kai si jadi man anak kempuna e, isaksiken kalak sideban i bas negerina. Janah tentuna sie terberita i tengah-tengah bangsana.
Ayat 4, 5 6 lit jaminen i bas Dibata, maka ersinalsal terang i bas si gelap nari. Ertina kalak si ertedeh ate nandangi kebenaren Tuhan ia i pasu-pasu guna jadi pasu-pasu ( diberkati untuk menjadi berkat, oge: Kejadin 12: 2,3 ) ia banci jadi terang guna nerangi kegelapen. Jenari erkiteken igejapna pemasu-masun Tuhan, ulih pencarinna pe igejabna i bas Dibata nari emaka melumbar ia guna pepinjamken. La terjeng bage ngenca tapi kalak si nggejabken pasu-pasu Tuhan di kune lit i bas ia kuasa ngelakoken si bujur i bas kerina urusen si iurusna, Tentuna nggit kalak ngguru ntah pe ndarami kebujuren i bas ia nari. Emaka labo ia terimbangi i bas erbage kejadin si lit, Dibata sekawalna, la ia guling.
Ayat 7-9 kalak si ernalem man Tuhan paguh ia i bas ngaloken berita si uga pe, la aru atena kerna perukuren kalak sideban si jahat nandangi ia, ermulia dingen ihamati ia erkiteken melumbar dingen mediate man kalak si kekurangen. Ertina ngasup ia ertimbang i bas kai-kai pe. Kepeken, i bas kebujuren lit si rate nembeh, gara ate kalak jahat ertina si jahat nutung bana.

Bage me kalak si pasu-pasu Dibata, la saja si mehuli ia ngasup ngalokenca tapi pe i bas si la bagi ukur ngasup ras paguh ia ngalokenca.

Pengkenaina.
Minggu enda si peringetti wari Keluarga Nasional. Radu ras si e silakoken PA gabungen kategorial ( kususna Moria, Mamre ras Permata ). Arah Masmur 112 enda itegasken maka malem ate jabunta adi kita tetap ertedeh ate nggeluh i bas kebenaren Tuhan. Si jadi masalah rusur maka kita terjeng ngorati Kata Dibata ngenca tapi la lit teridah i bas kinata alu bage terjeng sebatas pengangkan ngenca. Radu ras Pemasmur maka malem ate anak jabu adi Kerajan Dibata jadi i bas doni enda, pemena lebe tentu i bas jabunta nari (band. Matius 6:10: "Reh min KinirajanNdu, sehlah min peratenNdu, i bas doni enda bagi ni surga".) Enda me si nggeluh ras jadi perayaken i bas tep-tep jabunta.

Jabu eme Gereja si kitik i ja jabu eme ingan ( wadah ) kita mpraktekken kebenaren Dibata antara bapa, nande ras anak. Persoalenta eme megati sura-sura ras pengaruh doni enda si ngerintak kita seh maka la kita siap mersan kayu persilangta, la tetap ukurta ngandalken janji Dibata ( kurang tek kita maka i bas Tuhan ngenca lit posisi si aman ). Jadi labo kerina jabu kalak Kristen mahan bana ipasu-pasu Dibata, tapi si ipasu-pasu Dibata eme jabu si katawari pe ertedeh ate ( rindu ) ngukuri ras ndalanken si ngena ate Tuhan. Mungkin caranta erkiniteken perlu man pekenan: ula pasu-pasu Dibata e saja ngenca si darami, tapi jadiken lebe Dibata e jadi prioritas ras si berotoritas i bas jabunta. Umpamana: adi Dibata e ninta TUHAN ( bhs Junani = KURIOS, si ertina Raja / yang dirajakan ), maka si cidahkenlah otoritas ( kuasa ) Dibata e i bas kegeluhen jabunta sekalak-sekalak.

Mari si bangun keluarganta i bas palas erkemalangen man Tuhan sabap adi alu gegehta saja si bangun keluarganta maka kedungenna e sia-sia; tapi adi si bere Tuhan si mbangunca maka keluarganta pasti ipasu-pasuNa ( Masmur 127: 2 ). Hidup adalah untuk Tuhan dan untuk keluarga. Emaka ula erkiteken alasen sibuk erdahin, ninta guna anak tapi lupa mereken waktu, ula erkiteken sibuk piah lanai sempat ngelai ras ngikuti dahin-dahin Gereja. Ingetlah, maka i bas Tuhan ngenca jabunta banci aman! Padan Dibata man jabu si ertedeh ate nandangi kebenaren Dibata e me janji keselamaten pertendin labo terjeng sie ngenca keselamaten pe tetap nge ibereken Dibata, la pernah kita cilaka amin pe mbue persoalen. Emaka si pakekenlah geluh jabunta jadi pasu-pasu man kalak sideban ( hidup ini adalah kesempatan untuk menjadi berkat! ).

Sharing

Mari si diskusiken/sharing antara Mamre, Moria ras Permata, kai nge si jadi kata kunci si dat kita arah bahan PA enda guna ndatken pasu-pasu Dibata i bas jabunta?
Kerna kai si perlu si evaluasi/man pekenan i bas jabunta guna ndatken pasu-pasu Dibata?

Aksi:
Bahanlah jabu masing-masing kegiaten bersama. Umpamana : kebaktin keluarga, masak bersama, jalan pagi ras sidebanna.

Pdt. Hermanto Tarigan, MTh