Rukur Kreatif Ras Inovatif - Entrepreneurship, Nepa Peluang Usaha, Rukur La Bagi Biasa

Bahan Bimbingen PA Mamre Tanggal 21-27 April 2019

( Entrepreneurship, Nepa Peluang Usaha, Rukur La Bagi Biasa )

 
Ogen : Masmur 19:8-12

Undang-undang TUHAN
8. Undang-undang TUHAN e serta kap,
ia mereken gegeh si mbaru.
Perentah TUHAN terteki tuhu,
mereken pengertin man kalak si kurang pentar.
9. Undang-undang TUHAN benar kap,
e maka kalak si ngikutkenca meriah tetap.
Perentah TUHAN benar kap,
mereken pengertin ku bas perukuren.
10. Ersembah man TUHAN mehuli kap,
tetaplah e rasa lalap.
Putusen TUHAN adil kap,
dingen tetap rembang tengah.
11. Asangken emas murni pe jilen kap e
tebun asangken tengguli si entebuna.
12. Aku suruh-suruhenNdu
ndatken pemeteh ibassa nari.
Erkiteken kepatuhenku
dat upah aku ibassa nari.

Tema : Rukur Kreatif Ras Inovatif
Tujun : Gelah Mamre

1. Ngeteh Dibata ulu perukuren ras pemeteh si mehuli.
2. Makeken perukuren alu mbages ( maksimal ras kreatif )

Metode : Permainen

KATA PENARUH
Masmur ende-enden pusuh si mere gegeh man kalak si tek. Gegeh e rehna i bas hubungen si mehuli ras Dibata. Lit dua inti i bas kitab Masmur si jadi oratenta sendah eme "Ngerana kerna uga ulina Undang-undang Dibata ( Taurat TUHAN )" ras "Uga ulina kalak si ersembah man Dibata." Undang-undang man kalak Jahudi eme pedah Dibata si maba manusia nandai Dibata. Ije pe teridah biak-biak Dibata si man ikutenken. Lit ka pedah-pedah uga nggeluh i bas kebenaren. Bage pe ije i babai kita nggeluh bujur ras mehuli man teman manusia ras doni enda. Arah si e si idah maka pentar me kalak si ngantusi Undang-undang Tuhan sabab ietehna uga ia arus nggeluh subuk man Dibata bage pe man teman manusia ras doni enda. Jenari ersembah man Dibata e salah sada bukti kalak si erkemalangen man Dbata.

URAIAN TEKS / TAFSIREN
Man pemasmur Undang-undang TUHAN serta ( Ind: sempurna ). La lit babo doni enda si pernah lit ngatakenca undang-undang si ibanna serta, selain si ituriken ijenda. Undang-undang e mereken gegeh si mbaru. Tentuna man kalak si nggit ngukurisa suari ras berngi ( bdk. Msm. 1:2 ). Gegeh si mbaru e banci mere semangat, banci mere pengangkan si mbaru kerna kegeluhen, banci erbabanca ukur ergiah-giah. Bage pe Undang-undang Tuhan e mereken pengertin man kalak si kurang pentar. Kurang pentar i jenda e me si langa lit pengalamenna.

Undang-undang TUHAN e benar ( tepat ) ertina payo janah tuhu-tuhu jabab persoalen manusia. Emaka ulihna mereken keriahen ( menyukakan hati ). Perentah TUHAN e benar ( murni ) ertina maka la lit tujun si deban selain gelah sikap ras mehuli kegeluhen man kalak si nggit ngukurisa suari ras berngi. Ulihna eme mereken pengertin bas perukuren. Man kalak si nggit ngukuri perentah TUHAN i datca rusur perukuren si mbaru, si la idat kalak si la erkemalangen man baNa.

Ersembah man TUHAN mehuli ( suci ) emaka perlu lit kesetian i bas kegeluhen teptep wari. Kai si lakoken TUHAN kerina rembang tengah. Ertina labo lit ate TUHAN bene i bas kegeluhen enda tapi gelah sikap kerina janah ermalem ate. Kiniulinna lebihen asangken emas murni. Guna ndatken emas si murni lit proses si ilakoken. Uga murnina pe emas, ulin denga keputusen si i ban TUHAN. La lit sitik pe ije icemari dosa. Bage pe tebun asa tengguli. Tengguli eme pangan si tuhu-tuhu erguna man kalak Jahudi. Enda ulu gegeh ras vitamin si erguna secara daging kula ras perukuren. Tapi man kalak si ernalem man Pedah Dibata maka ergan ras ulin i datca asangken tengguli si entebu. Erdandanken si e maka kalak si rembak ras Dibata alu nggit ngoge ras ngukuri Pedah Dibata idatca me pengertin si mbages kerna kegeluhen lebih asa pemeteh doni enda. Enda ulih si banci inanami kalak si ngukuri Undang-undang TUHAN janah ersembah man baNa alu bulat ukur.

APLIKASI
Adi kita rukur biasa, maka perbahanenta pe biasa. Rukur la biasa si imaksudken tema eme uga kita ndarat i bas kebiasan ( out of box ) guna banci ndatken perukuren ( ide ) si mbaru. Adi la bage maka kai si ban kita sedekah enda enggo siakap lanai lit kurangna entah pe la sieteh uga cara ngubahsa ku si terulin. Umpamana kita erbinaga dahinta. Cuba si tatap dirinta darat nari, ula siakap kita si erbinaga e, kira-kira kai nge si man pekenan, jenis binagata, caranta erbinaga, entah tampilen binagata?

Umumna kisat kita rukur. Man kalak si bage, gelgel nge perkadena pe. Manusia situhuna labo atena ia 'berubah' sabab adi 'berubah' latih ndalani sada biak si mbaru. Tapi Mamre tahun enda arus pang ras nggit 'berubah' ku bas biak-biak si mehuli ( positif ). Rikutken ahli maka ban tabehna nggeluh i bas negerinta enda, lenga sepuluh persen pe si pake otakta. Lenga sipekeri (maksimal) sabab bage-bage saja pe enggo cukup man banta. Tapi perlu si eteh maka labo ate Tuhan kita bage-bage saja. Kita banci jadi pasu-pasu man enterem jelma. Emaka si pakelah alu mehuli perukuren si peturah si mbaru ( inovatif ) ras dahinta sedekeh enda pe reh sikapna si ban ( kreatif ). Kai gia pendahinta banci kerina sikap si ban. Ulu kepentarenta labo terjeng dirinta, maka bali ras bahan PA ta sendah e me Dibata. IA ngasup mereken kepentaren man banta lebih asa pemeteh doni enda. Enda si enggo i aloken Jusup i Mesir ras Daniel si pembuangen Babil. Pendahinna lebih asa kalak kerina. Kuncina eme nggit ngoge ras ngukuri Kata Dibata terlebih ndalankenca i bas kegeluhen teptep wari.

PERMAINEN:
Sekalak pemimpin mbabai permainen enda. Kita Mamre tetap saja i bas inganta kundul. Adi belaskenna sada, ban jari-jarita telu. Adi belaskenna dua nina, ban jari-jarita telu. Adi belaskenna telu ban jari-jarita sada. I babai pemimpin alu melasken angka si erpariasi. Si cubaken adi enggo mahir, reh terna iban.

Permainen enda ertina gelah ngingetken kita tema sendah gelah i bas kai pe banci si ban la bagi biasa gelah teridah kreatifitasta i bas pendahinta sekalak-sekalak.

USULEN ENDE-ENDEN

1. KEE GBKP No 399:1-3  ( KLIK JUDUL KEE UNTUK MELIHAT TEKS LAGU )
2. KEE GBKP No 201:1-2  ( KLIK JUDUL KEE UNTUK MELIHAT TEKS LAGU )
3. KEE GBKP No 471:1     ( KLIK JUDUL KEE UNTUK MELIHAT TEKS LAGU )
4. KEE GBKP No 462:1-2  ( KLIK JUDUL KEE UNTUK MELIHAT TEKS LAGU )

Pdt Yunus Bangun M.Th

Kabid Pembinaan Moderamen GBKP

HP. 081361625080

Share this post