Dibata Erdahin Alu Mehuli ( Entrepreneurship : Palas Teologi ) - Bahan Bimbingen PJJ 28 April - 4 Mei 2019

Bahan Bimbingen Perpulungen Jabu-Jabu 28 April - 4 Mei 2019

Dibata Erdahin Alu Mehuli

Entrepreneurship: Palas Teologi

Ogen : Kejadin 1 : 1 - 27

Turi-turin kejadin si nasa lit
1. Mula-mulana ijadiken Dibata langit ras doni.
2. Doni lume denga, la lit tempasna. Lawit si mbelang ergalumbang itutupi gelap mesangat, janah kesah Dibata kelaling-kelaling i babo lau engkuasaisa. 3. Nina Dibata, “Jadi lah terang” -- e maka jadi me terang.
4. Idah Dibata maka terang ndai tuhu-tuhu mehuli. Jenari isirangken Dibata terang ibas gelap nari.
5. Terang igelariNa “Suari”, gelap igelariNa “Berngi”. E maka ben me wari, jenari siang -- e me wari si pemena.
6-7. Jenari nina Dibata, “Jadi lah awang-awang guna nirangken lau ras lau si deban ras njagaisa gelah ola ersada.” Jadi me bagi si iperentahken Dibata e. Bage me ijadiken Dibata awang-awang guna nirangken lau si i das ras lau si i teruh.
8. Awang-awang ndai igelari Dibata “Langit”. E maka ben me wari, jenari siang ka -- e me wari si peduaken.
9. Nina Dibata, “Ersada lah kerina lau si lit i teruh langit i bas sada ingan, gelah lit teridah taneh kerah.” E maka jadi me bage.
10. Igelari Dibata taneh si kerah ndai “Daraten”, janah lau si enggo ersada ndai “Lawit”. Idah Dibata maka sinijadikenNa e tuhu-tuhu mehuli.
11. Kenca bage nina Dibata, “Turah lah i bas taneh nari kerina sinuan-sinuan, e me dukut-dukut si erbuah, kayu si erbuah si lit sinuanna i bas buahna.” E maka jadi me bage.
12. Turah me ibas taneh nari kerina erbage sinuan-sinuan; janah idah Dibata maka sinijadikenNa e tuhu-tuhu mehuli.
13. E maka ben me wari, jenari siang ka, -- e me wari si peteluken.
14. Nina Dibata, “Lit lah i langit barang si erbanca terang, guna nirangken suari ras berngi, jadi tanda-tanda permulan wari, tahun ras musim.
15. Janah ersinalsallah i langit barang si terang ndai guna mereken terang man doni.” E maka jadi bage.
16. Ijadiken Dibata dua barang terang si galangna, e me: matawari guna ngkuasai suari ras bulan guna ngkuasai berngi. Bage pe bintang-bintang ikut ijadiken Dibata.
17. Itamaken Dibata barang-barang si terang ndai i langit, guna nerangi doni,
18. ngkuasai suari ras berngi dingen nirangken terang i bas gelap nari. Idah Dibata maka sinijadikenNa e tuhu-tuhu mehuli.
19. E maka ben me wari, jenari siang ka -- e me wari si peempatken.
20. Nina Dibata, “Lit lah erbage-bage macam si nggeluh ndemi lau ras erbage-bage perik ndemi awang-awang.”
21. Jenari ijadiken Dibata rubia-rubia si mbelin si nggeluh i bas lawit, bage pe kerina erbage rubia-rubia si deban si nggeluh i bas lau, ras pe kerina erbage perik-perik. Idah Dibata maka sinijadikenNa e tuhu-tuhu mehuli.
22. Ipasu-pasuNa kerina. Nina Dibata man rubia-rubia si nggeluh i bas lau ndai, “Ertambah-tambahlah janah demi lah lawit.” Nina man perik-perik, “Ertambah-tambahlah.”
23. E maka ben me wari, jenari siang ka -- e me wari si pelimaken.
24. Nina Dibata, “Jadi lah i bas taneh nari kerina erbage rubia-rubia si nggeluh: kerina erbage asuh-asuhen ras kerina rubia-rubia si meliar, si galang ras kitik.” E maka jadi bage.
25. Ijadiken Dibata kerina erbage rubi-rubia si meliar, kerina erbage asuh-asuhen, ras kerina rubia-rubia si njoler. Idah Dibata maka sinijadikenNa e tuhu-tuhu mehuli.
26. Nina Dibata, “Genduari Sijadikenlah manusia si sentudu ras tempasTa, si menam seri ras Kita, gelah ikuasaina kerina nurung, perik-perik, bage pe kerina asuh-asuhen ras rubia-rubia si meliar, subuk si galang ras si kitik.”
27. E maka ijadiken Dibata manusia, si sentudu ras tempasNa; dilaki ras diberu ijadikenNa.

Entrepreneurship biasana iterjemahken pengusaha ntah usahawan. Adi i bas kalangen pemerintahen igelari wirausaha. Adi Dr ( HC ) Ir. Ciputra ngataken: Sekalak Entrepreneur ngubah kotoren ras rongsoken jadi emas. Kata kunci: kengasupen guna ngubah. Alu bage ngerana kerna entrepreneurship labo saja bidang bisnis, tapi pe i bas dampar pemerintahen, pendidiken ras sosial termasuk pelayanen gerejawi. Jadi, kata entrepreneurship ncakup kerina dampar kegeluhenta.

Kitab Kejadin itama arah lebe i bas Pustaka si Badia guna nuriken asal usul doni enda. Kuga benana doni enda ras isina? Kejadin i bas kata Junani genesis ertina "mulana." Dibata menata tinepa ( wari pemena njadiken terang, wari peduaken njadiken awang-awang, wari peteluken njadiken taneh kerah, wari peempatken njadiken barang-barang terang ) . Emaka Dibata mereken kegeluhen nandangi tinepa ( wari pelimaken njadiken ikan-ikan ras perik-perik, wari peenemken njadiken asuh-asuhen / rubia-rubia ras manusia ). Dungna itatap Dibata kerina tinepa-Na ndai, maka tuhu-tuhu mehuli. Emaka i bas wari pepituken: pekesahken ras ipasu-pasu Dibata kerina tinepaNa ndai. Tangkas kal teridah keleng ate ras kreativitas Dibata i bas njadiken doni enda.

Arah Kejadin 1:1-27 Dibata mpetandaken diriNa selaku si erdahin alu mehuli, i bas paksa genduari banci ikataken Dibata eme Entrepreneur Agung, arah karya kreatif erbahan perubahen si mbelin:

• Si rontang (la lit tempasna, "belum berbentuk") iubah jadi ratur, kerinana itamaken i bas inganna, sikap man tatapen. 
• Si mesuni (lume, kosong iubah jadi risin) maka arah siitepaNa e enggo kuh doni enda. 
• Si gelap iubah jadi terang erkiteken sie maka teridah kiniulin si itepaNa.

Arah pendahinNa e Dibata mereken kegeluhen i doni enda, kerinana itepaNa alu mehuli ras ratur. Kai lebe itepaNa janah kai i kedungenNa. Sikap kerina itamakenNa bas inganna.

Bage pe Dibata njadiken manusia sentudu ras tempasNa. Ertina lit biak Dibata i bas manusia. Umpamana rukur. Kita manusia ngenca banci rukur. Emaka banci si ukuri kerna si mehuli i bas kegeiuhen enda. Jenari lit iban Dibata pusuh peratenta, erdandanken si e maka banci lit hubungen si istimewa ras Dibata.

Itamaken Tuhan manusia ndai nggeluh i Peken Eden. Manusia jadi persuruhen Dibata guna ngusahai ras njaga kerina tinepa ( bdk.- Kej.2:15 "ngusahai ras njagai" ). Kata Eden i bas cakap Heber ertina kesenangen. Arah perentah si ibereken Dibata, banci min manusia nggeluhken geluh i bas kesenangen. Gelah tetap lit i bas ikesenangen' manusia arus make kesempaten si lit. Umpamana bagi perumpamaan kerna telu kalak juak-juak i bas Matius 25:14 - 30 sekalak ngaloken 5 talenta, sekalak 2 talenta ras sekalak nari 1 talenta. Bagi anak KAKR si ibereken man bana kertas "origami."Lit erbage-bage rupana. Anak-anak si kreatif beluh makeken kertas e jadi sada bentuk si mejile man tatapen. Alu bahan si seri tapi la seri ulihna. Bage pe lit ka nge anak si la ngasup makekenca, seh maka kertas ndai jadi sampah ngenca.

Arah PJJ nta enda si eteh benana nari enggo ipetandaken man banta maka Dibatanta eme Dibata sierdahin. Adi kita tempas Dibata, biakta pe biak erdahin. Meriah siakap ndahiken dahinta. Kita pe bagi tempas Dibata desken sekalak entrepreneur banci ngubah si rontang jadi ratur, lume jadi risi, si gelap jadi terang. Enda me ulih pendahinta. Enterem kalak kelsehen ndarami dahin sabab megati erdahin i bas pikirenta eme jadi Aparatur Sipil Negara (ASN), entah i bas Badan Usaha Milik Negara (BUMN). Orang tua pe enterem lenga akapna erdahin anakna adi lenga erdahin i bas negara enda. Adi bage pikirenta kerna erdahin maka labo banci kerina kita ndatken pendahin. Tapi bagi pengertin entrepreuner si ngubah kotoren jadi emas, maka situhuna ija pa pe banci kita erdahin entah erban ingan erdahin. Enda me si iarapken i bas kita nari gelah ula kita terjeng si ndarami dahin tapi alu kreatif si ciptaken pendahin.

Rusur si idah i Tanah Karo tomat, kol, rimo amparen duru dalan erkiteken la lako. Uga banci si enda si ubah jadi erguna lanai sia-sia. Adi banci si ban serpang pulah arah ngubahsa jadi saus tomat, entah jus rimo si erguna maka perjuma pe tersampat, kita pe banci erban ingan erdahin, pemerintah pe tersampat. Bage pe i bas ingan ras dampar si deban maka situhuna melala kal banci si peturah ingan erdahin adi nggit kita kreatif si jadi salah sada biak sekalak si entrepreneur.

EVALUASI :
Nggo nge sitotoken kerna calon si menang ras si la menang i bas Pemilu enda ndai?

DISKUSI :

1. Kuga nge 'cara kerja' Dibata, maka ikataken Dibata e erdahin alu mehuli?
2. Kai usul-usulndu guna meningkatken jiwa kewirausahaan (Entrepreneurship) i bas GBKP?
3. Kai usaha kreatif ras inovasi ( hat-hal si mbaru ) si banci ibahan i bas perpulungen-ta enda? 

AKSI :
Ubahlah barang bekas jadi sada hasil karya, umpamana: botol inemen jadi pot bunga, pipet (sedotan) jadi bunga-bunga ntah pe tas ras sidebanna.

USULEN LAGU :

1. KEE GBKP No. 209 : 1, 4  ( KLIK JUDUL KEE UNTUK MELIHAT LIRIK TEKS )
2. KEE GBKP No. 255 : 1, 3  ( KLIK JUDUL KEE UNTUK MELIHAT LIRIK TEKS )
3. KEE GBKP No. 306 : 1-    ( KLIK JUDUL KEE UNTUK MELIHAT LIRIK TEKS )
4. KEE GBKP No. 254 : 1,3  ( KLIK JUDUL KEE UNTUK MELIHAT LIRIK TEKS )

Topik Pertoton Syafaat

1. Gelah perpulungen ndahiken dahinna alu mehuli dingen kreatif
2. Gelah gereja banci melayani lebih kreatif.

Pdt. E.P.Sembiring, S.Th.

Share this post