Pilihlah Si Mehulina, Bahan PJJ 10 -16 Maret 2019

Pilihlah Si Mehulina

Pilipi 1 : 9-10

(Persikapen Pemilihen Calon Pertua-Diaken)

Ogen : Pilipi 1 : 9 - 10
9. Pertotonku kerna kam e me: Ertoto aku man Dibata gelah ertambahna min keleng atendu janah rikut ras pemeteh si tuhu-tuhu ras pengangkan si serta,
10. gelah ietehndu milihsa apai si mehulina. Alu bage bersih kam pagi dingen la erpandangen i bas warina Kristus reh pedua kaliken guna ngadili kerina manusia.

Erpalasken aturen GBKP maka Pertua ras Diaken ipepilihken setiap 5 (lima) tahun sekali, maka i bas tahun 2019 enda, enggo ka seh paksana pemilihen ilakoken. La banci lang, arus muri kita i bas ngelakoken pemilihen enda, gelah tuhu-tuhu kal kari terpilih si mehulina, jenari reh ulina pe tetap GBKP enda ku wari si reh. Uga maka banci terpilih si mehulina? Tentu arah pemilihen si mehuli, e me adi kerina pemilih ertoto janah erpengendes man Dibata.

I bas kitab Pilipi teridah maka pengaruh erkiniteken man Tuhan Jesus, erbage-bage si mehuli banci turah i bas geluh manusia. Umpamana, turah gegeh i bas ngalaken kiniseran. E teridah i bas geluh Rasul Paulus, bagi isuratkenna i bas kitab Pilipi enda. Surat man perpulungen Pilipi enda ibahan Paulus tupung ia i bas penjara. I bas bahan PJJ enda, icidahken piga-piga si turah i bas kegeluhen perpulungen Pilipi. Enda me si itotoken Rasul Paulus:
1. Gelah i bas perpulungen e turah keleng ate si erpalas ku bas pengangkan si serta. Keleng ate e ipeseh ku kerina kalak: ngkelengi Tuhan Dibata, teman manusia bage pe tinepa Dibata.
2. Kepentaren Dibata si lit i bas manusia erbahan ia ngasup ngidah kai si mehuli ras meherga. E maka kalak si lit i bas ia kepentaren Dibata, ia ngasup milih ras muat keputusen si leblh payo gelah turah si mehuli tole ku wari-wari si reh enda. Termasuk i bas kita ngelakoken pemilihen Pertua ras Diaken bas tahun enda, kepentaren si bage min lit i bas kita, maka terpilih pagi serayan Tuhan, si mehulina. 3. Alu turahna kepentaren e mabai manusia ngasup njagai hubungenna ras Tuhan, Gerejana, masyarakatna ras lingkungenna tetap mehuli seh ku wari pendungi pagi.

Jadi, turahna kekelengen, pemeteh ras kepentaren i bas perpulungen Pilipi, erkiteken ia erkiniteken man Tuhan Jesus. Kepentaren e erbahanca ngasup ia jadi teman / senina man Rasul Paulus, i bas suka duka kegeluhenna selaku perberita si mehuli. Keputusen si mehulina enda, tuhu-tuhu mendukung dahin Berita si Meriah. Janah si e banci ibuat perpulungen e, erdandanken kepentaren si lit bas ia. Bas kegeluhen enda lit 2 ( dua ) ulu gegeh ras kepentaren e, si banci sialoken, e me: i bas kita ersada ras Tuhan ras bage pe i bas ersada arihta sapih-sapih kita manusia. Jadi sumber gegeh si 2 ( dua ) enda me lit i bas Paulus bage pe i bas perpulungen Pilipi, maka ia megegeh bas si mehuli.

Bage me arapen i bas perpulungenta si genduari, i bas persadanta ras Tuhan, i je me si datken gegeh ras kepentaren. Si e erguna i bas ngalaken erbage-bage pinakit sosial, ndalanken si mehuli, termasuk i bas ngelakoken pemilihen pertua diaken i bas gerejanta. Alu ndahiken dahin enda la mekarus maka terpilih me serayan Tuhan si pakena maba kiniulin ras kemajun gerejanta.

I bas pengalamenta, si erbahan ulih pemilihen e la mejile, adi sidalanken erpalasken sura-sura doni enda. Si mehulina i bas kita milih serayan Tuhan si pertimbangken kinitekenna ras lagu langkahna si tep-tep wari ( bdk. 1 Tim. 3:1-13 ).

Kita isuruh lako rukur ras milih Pertua Diaken, labo ngajuk kita gelah kita rukur negatip kerna kalak si deban. Tapi rukur positip ras mehuli kerna teman-temanta. Sukat-sukat i bas milih pertua diaken labo erpalasken perukuren manusia tapi erpalasken si ngena ate Tuhan. Gelah kai pe pagi ulihna bas pemilihen e kerina maba keriahen ras terpuji gelar Dibata.

EVALUASI :
Nggo me kita sikap guna milih ras ipilih jadi pertua diaken?

DISKUSI :

1. Turiken dage biak-biak kai-kai saja si perlu lit i bas kita ersikap milih calon Pertua ras Diaken segelah sidatken calon Pertua ras Diaken si mehulina?
2. Kai si ban si jadi sukat-sukatna i bas nentuken pilihen jadi calon Pertua ras Diaken periode enda?

AKSI :
Rukur ras ercakap-cakap alu positif ras teman bage pe isi jabu, kerna pelayanen gereja si mehulina, guna kemajun GBKP ku wari sireh enda.

USULEN LAGU :

1. KEE GBKP No. 68 : 1, 3          ( Klik Judul Lagu Untuk Melihat Lirik Lagu )
2. KEE GBKP No. 168 : 1 - 2       ( Klik Judul Lagu Untuk Melihat Lirik Lagu )
3. KEE GBKP No. 249 : 1, 4, 5    ( Klik Judul Lagu Untuk Melihat Lirik Lagu )
4. KEE GBKP No. 297 : 1, 2        ( Klik Judul Lagu Untuk Melihat Lirik Lagu )

1. Gelah proses pemilihen Pertua ras Diaken terus ku penangkuhenna banci erdalan alu mehuli.
2. Tim Sosialisasi ras Panitia Pemilihen Calon Pertua ras Diaken terus ku pembinaanna i bas tahun 2019, erdalan alu mehuli.

Pdt. Kongsi Kaban, S.Th.

Share this post