Pilihlah Si Bujur, Bahan Bimbingen PJJ 24 - 30 Maret 2019

Pilihlah Si Bujur - PEMILU ( Bimbingan PJJ 24 -30 Maret 2019 )

Keluaran 18 : 21

21. Tapi tambah si e, arus pe ipilihndu piga-piga kalak si ngasup jadi peminpin bangsa enda, e me ngasup minpin 1000 kalak, seratus kalak, lima puluh kalak, ras sepuluh kalak. Kalak e kerina arus mbiar man Dibata, banci iteki, janah la nggit isogok.

Masmur 37 : 27 - 31

27. Tadingkenlah si jahat, lakokenlah si bujur,
gelah sinursurndu rasa lalap ngiani taneh enda.
28. Sabap ngena kal ate TUHAN keadilen
janah la itadingkenNa kalak si erkemalangen man baNa.
Kalak si bujur asa lalap ipekena-kenaNa,
tapi kesusuren kalak jahat ipelawes.
29. Kalak bujur me si ndatken bagin taneh i bas negeri e,
janah ringan ia i je rasa lalap.
30. Kalak bujur melasken ranan si pentar,
dingen si benar nge si ibelaskenna.
31. Ibunikenna Undang-undang TUHAN i bas pusuhna,
la ia pernah nilah i jenari.

I bas tanggal 17 April 2019 i bas negaranta enda ilakoken pemilihen legislatif ras pemilihen Presiden ras wakilna secara serentak. I bas sejarah bangsa Israel, Dibata me si milih ras ngangkat ise ateNa jadi pemimpin man bangsaNa. Tapi jaman genduari | tengah-tengah bangsanta, kita ibereken kesempaten guna milih ise si jadi pemimpinnta. I bas sienda tek kita selaku anak-anak Dibata, kita ibere Dibata kesempaten guna milih ise si jadi pemimpinta. Kesalahen milih pemimpin banci jadi kemunduren tapi pilihen si tepat ( mehuli ) maba erbage-bage kemajun. I bas Padan si Ndekah megati ituriken maka pemimpin nentuken nasib rayatna. Adi rajana bujur maka rayat makmur, ipasu-pasu Dibata janah adi lang bene me rayat.

I bas Keluaren 18:21, secara khusus Jetro mereken pedah man Musa gelah ngangkat pemimpin-pemimpin si banci nampati ia guna jadi wakil Dibata guna ngadili perkara kalak Israel bagi si ilakoken Musa. I bas sie Jetro mereken pedah uga si payo bas ndahiken dahin bagi si ilakoken Musa. Si pemena, arus lit jiwa kepemimpinenna. Pemimpin e ngasup erdahin bas tingkaten tanggungjabab si ibereken man bana ( seribu, seratus, lima puluh, ras sepuluh kalak ). Tentu pemimpin si iidah Jetro eme pemimpin si banci ipimpin. Sabab uga nina jadi pemimpin adi ia pe la banci ipimpin. Sekalak pemimpin i bas 10 kalak tentu arus nggit ipimpin pemimpin si seratus kalak bage seterusna. Sipeduaken nina maka ia arus erkemalangen man Dibata. I bas ayat 20, arus lit i bas ia pemeteh kerna undang-undang Dibata ras ngasup nerangkensa. Lit ketrampilenna. Erkiteken pemimpin e, eme wakil Dibata man bangsa Israel, emaka erkemalangan man Dibata ras ngangka undang-undang Dibata eme jadi palas sekalak pemimpin kalak Israel. Sipeteluken nina arus terteki, la banci isogok. Terteki tentu arus iperdiateken arah kegeluhenna (track recordna). Arah perbahanen ras lagu langkahna turah keyakinen kalak man bana. Termasuk la ngaloken suap ras ncidahken usihen i bas kai-kai pe. Arah si enda si idah maka labo mesunah Musa ndarami pemimpin israel jadi permakan. Arus lit penandai si payo kerna kalak si atena gelah ngasup dingen metunggung ndahiken dahin.

I bas Masmur 37:27-31, pemasmur nuriken gelah nadingken kejahaten sabab kejahaten sada hal si sea-sea. Kejahaten ras kinilabujuren erbahanca reh ukumen Dibata man manusia si erbahanca bene erbage-bage si mehuli. Sebalikna pemasmur ngiahken kita gelah ngelakoken si bujur. I bas Pustaka si Badia, "bujur" megati ikawitken ras ngelakoken perbahanen si payo, uga arusna kita selaku anak-anak Dibata. Kebujuren ngena ate Dibata janah jadi dalan maler pasu-pasu Dibata. Kalak si bujur perbahanenna i bas kai pe labo perlu mbiar sabab Dibata ras ia. Adi i bas Masmur enda adi sibaba i bas konteks pemilihen ( Pemilu ) maka banci siertiken pemasmur ngajuk kita gelah milih pemimpin si bujur ras ngelakoken keadilen, janah runtung kal kita milih pemimpin si bage sabab Dibata ras ia. I bas Padan si Ndekah siidah Jusup ras Daniel si jadi contoh pemimpin si i kawali Dibata, maba kesejahteran nandangi kerajaan si ilayanina.Dibata erdahin i bas kebujuren. Adi kita nggeluh bujur, berarti sibereken dirinta jadi ingan Dibata erdahin maba pasu-pasu. Kebujuren e erguna labo saja man kalak si ngelakokenca tapi ulihna terus ku sinursurna. Sebalikna pe kejahaten maba kesusahen labo saja man singelakokenca tapi pe ku sinursurna. Emaka lanai lit pilihen man banta selain nggeluh bas kebujuren janah adi ibereken Dibata kesempaten man banta jadi perkakasNa guna nentuken peminpinta maka kalak si bujurlah si pilih.

EVALUASI :
Enggo nge sisehken usuienta ku musyawarah warga sidi?

DISKUSI

Kai-kai saja syarat-syarat pemimpin si man pllihen?
Kai ulihna adi i bas PEMILU enda terpilih kalak bujur ras kai ka ulihna adi siterpilih kalak si la bujur?

AKSI
Nulak politik uang (money politik) janah ndarami informasi nandangi calon legislatif ras capres / cawapres si man pilihen.

USULEN LAGU

KEE GBKP No. 209 : 1-2 ( KLIK JUDUL KEE UNTUK MELIHAT LAGU )
KEE GBKP No. 381 : 1-2 ( KLIK JUDUL KEE UNTUK MELIHAT LAGU )
KEE GBKP No. 62 : 1-2 ( KLIK JUDUL KEE UNTUK MELIHAT LAGU )
KEE GBKP No. 338 : 1,3 ( KLIK JUDUL KEE UNTUK MELIHAT LAGU )

TOPIK PERTOTON SYAFAAT :

Notoken pelaksanaan Pemilu getah banci erdalan alu mehuli.
Notoken kerina calon-calon pemimpin si ikut muat bagin i bas pemilu gelah banci ngelakoken si ngena ate Dibata.
Notoken gereja gelah banci nuduhken kesaksin, jadi sira ras terang i bas pemilu, nehken peraten Dibata.

Pdt. Vicardo A. Ginting, S.Th.