Persiapan Pemilihan Calon Pertua / Diaken, Bahan PA Permata 3 - 9 Maret 2019

Nats : Bilangen 3:5-13
Kalak Lewi itugasken nampati imam-imam

5. Nina TUHAN man Musa,

6. “Babalah suku Lewi ngadap janah tugaskenlah ia nampati Imam Harun.
7. Dahinna e me ndahiken dahin-dahin si iperluken i bas Kemah Perjumpan ras ndalanken tugasna guna imam-imam ras guna perpulungen e kerina.
8. Ia arus ngurus kerina alat-alat si lit i bas KemahKu ras ndalanken tugasna guna kalak Israel si debanna.
9. Ia ertanggung jawab nampati Harun ras anak-anakna saja ngenca.
10. Harun ras anak-anakna arus itugaskenndu ndahiken dahin-dahin keimamen. Kalak si deban si ncubakenca ndahiken dahin e arus ibunuh.”
11. Nina TUHAN man Musa,
12-13. “Genduari kalak Lewi enggo jadi sikerajangenKu. Tupung Kubunuh kerina anak sintua kalak Mesir, enggo Kupeserap jadi sikerajangenKu anak sintua i bas kerina keluarga kalak Israel ras anak si pemena i bas kerina asuh-asuhen. Genduari, suku Lewi enggo Kubahan jadi ganti anak sintua bangsa Israel jadi sikerajangenKu; suku Lewi Aku empuna. Aku kap TUHAN.”

Tema : Iserapken Guna Ngelai

Gelah PERMATA GBKP:

Ngangkai alasen ras tujun pemilihen kalak Lewi erpalas nas
Sikap guna milih ras ipilih jadi Pertua ras Diaken i tengah-tengah gereja

Metode :Diskusi dan Inventarisasi
(PERMATA GBKP yang sudah pernah menjadi Pertua Diaken)

I. BENA KATA
Kata 'iserapken' si jadi tema PA enda, i bas cakap Indonesia ertina 'dikuduskan.' Tole, kata 'iserapken' banci iertiken 'dipisahkan' idur si melket nari. Bage pe banci ka iertiken 'ikhususken' guna sada dahin. Kata enda semal itandai i bas Padan si Ndekah (bdk. Kel. 29:43, Im. 8:10). Iserapken e banci sada ingan, jelma, banci barang / benda, umpamana Deleng Sinai, Bangsa Israel, Rumah Pertoton, minak pengakuhen rsd. Enda kerina iserapken guna Dibata. Adi jabaten si iserapken eme imam, raja ras nabi. Genduari ngerana kita kerna pemilihen kalak Lewi jadi imam si erdahin ngelai Tuhan. Kerina si iserapken eme guna kemulian Dibata.

II. ISI
Benana maka kerina anak sintua ras buah pemena ( sulung ) eme sikerajangen Tuhan. I bas ayat 13 ikataken Dibata palasna eme tupung i Mesir kerina anak sintua mate. Enda tulah si pesepuluhken si ngkenai kerina kalak Mesir ras kerina asuh-asuhenna. Janah erdandanken si e itetapken Dibata kerina anak sintua i bas kalak Jahudi eme sikerajangen Tuhan, si ngelai Tuhan i bas Kemah si Badia. Tapi kedungenna si idah maka sinursur Harun me jadi imam raduken kerina kalak Lewi si nampatisa.

Pemilihen man sinursur Harun ras kalak Lewi ipertegas Dibata mulihi i bas Bilangen 17. Ije isuruh Dibata Musa gelah nuruh sekalak tep-tep suku si sepuluh dua maba cikenna ku Kemah Perjumpan. Ciken ise si ertunas pepagina eme kalak si pilih Dibata jadi imamna. Kemah Perjumpan sada gambaren man banta maka kalak enda nggeluh denga i bas perdalanen ku negeri Kanaan. Ia pindah-pindah denga ( nomaden ) emaka inganna ersembah man Dibata i bas kemah denga. Kerina kepala suku si sepuluh dua ngikutken bagi si iperintah D ibata erkelangken Musa. Pepagina maka idah Musa ciken si ertunas eme ciken Harun. Icidahkenna man kalak Israel uga Dibata milih Harun ras sinursurna bage pe kalak Lewi jadi Imam Dibata si ngelai Ia i bas Kemah Perjumpan.

Kalak Lewi eme kerina sinursur. Lewi anak Jakub, termasuk Musa ras Harun kalak Lewi ( bdk. Kej. 49 ). Jadi, si ipilih Dibata jadi imam-Na eme kesusuren Harun janah kerina kalak Lewi nampatisa ( ay. 6 ). Dahinna eme nikapken kerina si iperluken i bas Kemah Perjumpan, umpamana ngurus kerina alat-alat si lit i bas Kemah Perjumpan. Dahin enda eme dahin badia erdandanken si erdahin pe enggo 'iserapken' ntah ikhususken Dibata.

III. PENGKENAINA
I bas tahun enda ilakoken me periodisasi Pertua ras Diaken i tengah-tengah GBKP. Erdandanken sie, ersikap kita kerina ngawan ni perpulungen guna milih entah ipilih jadi Pertua ras Diaken. Pertua ras Diaken si terpilih eme desken kalak Lewi si ipilih Dibata ndahiken dahin-Na. Cara Dibata ibas ogenta ngerana arah Musa ras ipertegas-Na arah erban tanda ciken si ertunas. Genduari Dibata erdahin arah kerina ngawan guna milih si erdahin-Na. Erdandanken dahin enda seri nge pentingna ras Dibata milih kalak Lewi maka la banci kita mekarus. Perlu kita niksiki ras notoken pilihenta, mindo gelah ituduhken Dibata si payo.

Erpalasken Tata Gereja Tata Laksana pasal 91 ras 95 enggo ituriken syarat-syarat kerna Pertua ras Diaken. Igejapna ia idilo Dibata. Teridah pe arah lagu langkah si tep-tep wari ncidahken usihen. Enggo ingawanken janah umurna simeterukna dua puluh lima tahun. Enggo jadi anggota runggun sikurangna dua tahun. Enda me piga-piga persyaraten i bas pemilihen enda. Arah sie maka piga-piga PERMATA GBKP enggo banci ikut milih ras ipilih. Janah si idah i bas piga-piga runggun enggo lit PERMATA GBKP si jadi Pertua ras Diaken. Ketutusen ras kualitasna labo kurang ras Pertua Diaken si deban. Justru i bas piga-piga dampar enggo banci isampatina dahin runggun arah talenta ras kebeluhenna, umpamana i bas bidang IT ras ndungi data base perpulungen.

Melala si mehuli si banci ibereken PERMATA GBKP nandangi kemajun gerejanta. Kune 'anak si nguda' i bas gereja la aktif maka situhuna 'masa depan' gereja e enggo bene. Emaka masa periodisasi enda ipake sada kesempaten guna ras-ras ndukung dahin-dahin gerejanta. Salah sadana eme alu pusuh si erdilo ikut milih ras ipilih jadi Pertua Diaken.

IV. DISKUSI
Inventarisasi PERMATA GBKP si enggo pernah jadi Pertua Diaken. Gargari kai kelebihen ras kai kekurangen adi PERMATA jadi Pertua

V. USULAN LAGU