Mpersukuti Dibata I Bas Milih Serayan - Bahan PA Moria 17-23 Maret 2019

Bahan Bimbingen PA Moria : Pemilihan Pertua Ras Diaken

SI MAN OGEN : 1 Samuel 16: 1-7

Daud ipilih jadi raja
1. Nina TUHAN man Samuel, “Asa kai nari dekahna atendu ceda kerna Saul? Enggo kutulak ia jadi raja Israel. Tapi genduari buatlah minak saitun jenari laweslah ku Betlehem ndahi Isai, sabap enggo Kupilih sekalak anakna jadi raja.”
2. “Uga banci kubahan si e?” nina Samuel nungkun. “Adi ibegi Saul kerna si e tentu ibunuhna aku!”
Nina TUHAN njabapsa, “Babalah sada anak lembu jenari kataken maka kam reh ku je erbahan persembahen gelehen man TUHAN.
3. Undang Isai ku lakon persembahen e, jenari Aku denggo ngatakenca kai si man bahanen. Tangkuhkenlah jadi raja kalak si Kutuduhken man bandu.”
4. Minter idahiken Samuel kai si isuruh TUHAN, jenari lawes ia ku Betlehem. Peminpin-peminpin kuta e alu nggirgir reh ngalo-ngalo ia janahna nungkun, “Ma dame nge kerehenndu enda?”
5. “Dame” nina ngaloi, “Aku reh nehken persembahen man TUHAN. Bersihkenlah dirindu jenari ikutkenlah aku.” Isai ras anakna pe isuruh mersihken dirina, jenari iundangna kerina ku bas lakon persembahen e.
6. Kenca ia reh kerina, idah Samuel anak Isai, Eliap gelarna, jenari nina i bas ukurna, “Si enda, si tedis i jenda i bas adep-adepen TUHAN, la banci lang enda me si enggo ipilihNa.”

7. Tapi nina TUHAN, “Ola nehen kuga gedangna ras kuga jilena rupana. La ia Kupilih, sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna.”

T E M A : MPERSUKUTI DIBATA I BAS MILIH SERAYAN
T U J U N : Gelah Moria:

Meteh Samuel tetap ersukuten man Dibata i bas milih serayanNa
Milih serayan erpalasken sura-sura Dibata
Meteh maka dahin milih serayan Tuhan eme persuruhen Dibata.

METODE PA : Perenungen / Paksa Teneng.

Kata Penaruh.
Labo mesunah ndarami pemimpin si mehuli si patuh man Dibata, janah erkeleng ate man rakyatna. Perlu ipenggurui Dibata gelah banci idat sura-suraNa. Contohna, i bas pemilihen serayan Tuhan, gejaplah kita enda tan Dibata si ipakeNa milih serayanNa. Alu bage labo si bagi sura-suranta si man pilihen tapi mpersukuti Dibata. Rikutken si enda penting kal ersikap i bas milih serayan Dibata, sabap silakoken kita e la terjeng kerna dirinta ras perpulungen tapi lebih asa sie, kerna Dibata si mada Gereja e. Sehubungen ras pemilihen serayan GBKP tahun enda, ipersukutilah Dibata. Terlebih serayan e labo seri ras pemimpin. Adi serayan arus mbiar ras patuh man Dibata. Pemimpin, mbiar rayatna man bana ras langa tentu is mbiar man Dibata.

Mpebagesi Pengangkan Kerna Ogen.
Samuel, jadi nabi Israel i bas masa perubahen (transisi). Perubahen e, emekap kerna pemimpin sedekah enda hakim-hakim gundari raja. Tugas raja eme ngerunggui persoalen-persoalen si turah i bas bangsa Israel. Pengaruh arah bangsa sekelewetna si make raja jadi pemimpin erbahansa bangsa Israel pe kedungenna mindo raja si jadi pemimpin man bana. Ceda ate nabi Samuel kerna pemindon bangsa Israel sabap bangsa e lanai erpersukuten man Tuhan, raja si pemena si ipilih Tuhan, eme Saul, i bas kepemimpinenna si perpudi la erpenggurun man Dibata. Em erbahansa Saul itulak Dibata. Erdandanken sie, minter isuruh Dibata Samuel ku Betlehem ndarami gancih Saul.

Kerina perlengkapen guna penangkuhen si Daud jadi raja, enggo isikapken Samuel bekas persuruhen Dibata (ay. 5). Aminna gia pusuhna dem alu aru ate ras kebiaren. Sabap si ilakokenna e petembil ras perukuren raja Saul. Sekalak nabi arus nge patuh man rajana adi raja e pe patuh ka man Dibatana. Enda me perbeben Samuel. Bage gia rencana Dibata arus nge tetap idalanken. Emaka, Samuel berkat ku Betlehem guna naruhken persembahen janahna ersembah.

Kenca seh Samuel i Betlehem, nggir-nggir me pemimpin wilayah Betlehem. Tersungkun-sungkun ukurna kerna tujun kerehen Samuel. Sabap biasana adi sekalak nabi ntah sekalak hakim reh ku sada daerah dua ngenca tujunna eme nehken ukumen ntah pasu-pasu, berita kedamen ntah berita peperangen. Ituriken Samuel me tujunna eme berita perdamen sabap Dibata si milih is naruhken persembahen ras mbersihken diri bagi aturen agama Jahudi. I bas upacara persembahen e ikut pe si Isai ras anak-anakna. Samuel mperdiateken anak-anak Isai ntah kimaun lit salah sada si ngena ate Dibata. Kepe kerina anak-anak Isai sikap daging kulana rikutken pengidah Samuel. Perukuren Samuel e lenga sendalanen ras peraten Dibata, terlebih si man pilihen e guna jadi sekalak raja bangsa Israel.

Emaka isungkun Samuel si Isai, ntah lit denga anakna si deban si lenga ikut i je. Piahna idilo Isai me Daud anakna si paksana ermakan i mbalmbal. Teridah me maka Daud si isuraken Dibata. Adi arah ukuren daging kula, ndauh kal perbedan Daud ras kaka-kakana. Tapi Dibata kepe la ngenehen perdagingen ( penampilen ) tapi ngenen pusuh peraten si njulus ras erpengarapen alu paguh.

Pengkenaina.
Pembahasen kerna si man ogen enda eme gelah kerina Moria ngangkai kerna pemilihen Pt/Dk Gerejanta bas tahun enda. Sehubungen ras milih serayan GBKP tahun enda perlu si persukuti Dibata alu mpebagesi pengangkanta kerna ogen si sendah, emaka cataten si penting eme:

Milih serayan, alu mperdiateken kinitekenna, kininggitenna, kiniteruken rukur ras pergaulen si sehat. Enda me syarat si utamana, enda biak ras sarat si lanai tertawar.
Milih serayan labo erpalasken 'wibawa' doni (kalak 'terpandang', erjabaten, bayak ras sideban). Metenget kita kerna si enda, sabap lit biakta mperdiateken ntah pe erbahan sukat-sukat terjeng penampilen ngenca si idah. Matanta si penggurui (tipe visual), si enda ngataken labo la perlu penampilen, tapi labo e si utama.
Milih serayan ola alu tujun mperobahi sifat si la mehuli bas calon. serayan e. Sabap adi si arapken ia robah kenca jadi serayan banci jadi kita terluda / kecewa. Janah ia pe jadi meganjang ukurna.

Alu bage, guna ndatken serayan si ngena ate Dibata, labo banci ikarusken ntah iguro-guroken gelah menggo tapi perlu itotoken alu tutus ras mbages, gelah iperlengkapi Dibata kita ngawan perpulungen bagi Samuel.

Perenungen / Paksa Teneng:
Si pakeken kesempaten enda guna ras-ras paksa teneng ngukuri kerna sura-sura Dibata nandangi pemilihen pertua/diaken i bas Gerejanta. Emaka iumputi alu rende No. 68. Alu setengah sora janah iulihi 2 ntah 3 kali.

DahinNdu si mbelin Tuhan kerajang kami pe.
Ban Kam si mada kerajan, la masap lalap e.
Tapina nagi page me, gelah erlusi torah pe
Emate kap benih le bage pe kami k'rina nge, nggit mate pe
Lah turah page nge

Idungi alu sekalak mbaba pertoton kusus kerna pemilihen Pertua ras Diaken enda.

Pdt. Yunus Bangun, MTh.