Bimbingen PA Mamre 10 - 16 Maret 2019, Enterpreneurship Ras Kesehaten

Bahan Bimbengen PA Mamre 2019

Ogen : 1 Korinti 6:12-20

Pakelah kulandu guna muji Dibata
12. Banci jadi lit si ngatakenca, “Bebas kap aku ngelakoken kai pe.” Payo nge min, tapi labo kerina erguna. Aku pe banci nge kukataken, “Bebas kap aku ngelakoken kai pe,” tapi la kupelepas kai pe ngkuasai aku.
13. Banci ka nina kalak tole, “Pangan ma guna beltek nge, janah beltek ma guna pangan?” Payo nge katana e, tapi duana pagi imasapken Dibata! Labo tuhu maka kula manusia guna erlagu la mehuli, tapi guna Tuhan; janah Tuhan guna kula.
14. Dibata enggo mpekeke Tuhan i bas si mate nari, janah kita pe ipekekeNa nge pagi alu kuasaNa.
15. La kin ietehndu maka kulandu e me ringring Kristus? Banci kin kubuat ringring Kristus e jenari kubahan e jadi ringring diberu si pendahinna erlua-lua? Tentu lang!
16. Ntah la kin ietehndu maka kalak si ersada kula ras diberu si pendahinna erlua-lua enggo ia jadi sada kula rassa? Kerna si enda tangkas i bas Pustaka Si Badia, nina, “Si dua kalak e jadi sada kula.”
17. Tapi kalak si mpersadaken dirina ras Tuhan, enggo ia jadi sada ras Tuhan secara pertendin.
18. E maka silahkenlah perbahanen erlagu la mehuli.
Banci ka pe nina kalak, “Kasa kai dosa si ilakoken kalak labo mpengaruhi kulana.” Tapi e labo payo, sabap kalak si erlua-lua erdosa ia nandangi kulana.
19. La kin ietehndu maka kulandu e me Rumah Pertoton Kesah Si Badia, si ringan i bas kam dingen si ibereken Dibata man bandu? Dirindu e labo kam empuna.
20. Sabap kam enggo itukur Dibata meherga kal. Dage muliakenlah Dibata arah kulandu.

Tema : Njaga Kesehaten
Tujun : Gelah Mamre

Meteh maka kula eme rumah pertoton Kesah, si arus ijaga, ipelihara
Jadi penggerak kesehaten i bas jabu, gereja ras masyarakat

Metode : Ceramah

KATA PENARUH
Nggeluh badia eme pendilo Dibata man kerina kalak Kristen segedang geluh. "Kam arus badia sebab Aku pe badia" ( 1 Pet.1:16, bdk. Im. 11:45-46). Kebadian e teridah i bas kerina aspek kegeluhen. Engkai maka perlu si jaga kebadian dirinta? Tupung manusia ndabuh ku bas dosa, pusuhna ikuasai sura-surana jine, lanai lit kebiaren manusia e ngelakoken kejahaten seh maka hubungenna ras Dibata enggo ceda. Manusia la ngasup mpekena hubungen si enggo ceda e erkiteken kelemahenna. Janah mesui atena ndalani kegeluhen sebab tetap iteruh kuasa dosa. Mekuah ate Dibata natap manusia e tapi dosa si ibahanna e la pernah ngena ateNa. Erkiteken dosa manusia arus iukum, E maka i datas kayu persilang Jesus, kerina dosa manusia ndai iangkat, itamaken ku bas baraNa. Jesus nanggung kerina ukumen erkiteken dosa manusia ndube. Seh Ia mate alu ngamburken dareh ras kesahNa. DarehNa e mbersihken manusia i bas dosa-dosana nari. I bas wari peteluken keke Ia bas si mate nari, janah italukenNa kuasa dosa. Erkiteken sie, kita si enggo itebus ndai pe menang dingen kuasa dosa lanai ergegeh man banta. Kita enggo bebas i bas dosa-dosanta nari. Hubungen manusia ras Dibata mulihken mehuli. Em erbahansa kita arus tetap nggeluh badia.

URAIEN TEKS / TAFSIRAN
Pengajaren Paulus kerna kebebasen kalak Kristen iturikenna i bas sada kalimat, "bebas kap aku ngelakoken kai pe, tapi la ku pelepas kai pe engkuasai aku." Ertina kalak Kristen enggo bebas i bas kuasa dosa bage pe i bas undang-undang. Lanai lit si ngiketsa erkiteken Kristus. Kebebasen e la banci isalahgunaken, aminna pe kalak Kristen bebas ngelakoken kai pe, tapi tetap i bas sura-sura Dibata. Kebadian nggeluh arus tetap ijaga sebab Dibata e badia.

I bas kinatana, perbahanen kalak Korinti labo bagi siniarapken Paulus. Adi ikataken enggo bebas, maka kerina banci nge ilakoken. Lanai lit aturen-aturen si ngiketsa. Emaka kalak enda ngendesken dirina ku bas perbahanen si la mehuli si tujunna guna pesenangken diri. Lit pemahamen si la payo maka ngelakoken "hubungen seksual" e sada kebutuhen bali ras ngaloken pangan si teptep wari. Emaka enterem kalak enda erlua-lua, ngelakoken hubungen seksual si labo ras ndehara entah perbulangenna. Iandingkenna sie kerina bagi kalak si man pangan-pangan. Janah e labo salah. Kalak enda ndarami kebenaren dirina alu alasen e me keperlun daging kula.

Emaka nina Paulus, payo pangan e guna keperlun beltek, janah beltek man guna pangan. Sie kentisik nge ngenca, sabap seh me paksana pagi ngadi nge. Tapi kulanta enda enggo itebus Tuhan Jesus alu darehna si meherga. E maka labo banci kula guna pesenangken diri alu erlua-lua, sebab kulandu e sekerajangen Dibata. Kula e guna Tuhan, Tuhan guna kula. Ipekekena kita pagi i bas si mate nari bali ras Kristus. Tole pe nina Paulus, tep-tep kalak Kristen eme kula Kristus, ia enggo ersada ras Kristus. Banci kin kalak si enggo ersada ras kristus, ersada kula ka ras diberu perdenggal ? Kalak si bage ipeturutna dirina melket mulihken ras ipeterukna bana. Si arusna kin ia enggo meherga ras mehaga sebab ia ringring Kristus.

Erkiteken sie e nina Paulus, erlua-lua e arus ndauh bas kam nari, sebab encedai kula Kristus ras kebadian nggeluh. Erlua-lua e sada kejahaten ngelawan Dibata. Kulandu e enggo itukur Dibata meherga, janah ibahanNa kulandu e jadi ingan man Kesah si Badia. Kesah e me si njamini kita tetap jadi sekerajangen Dibata. Kesah e me si nampati kita ngelawan perbahanen dosa ras tetap nggeluh badia. Alu njaga kebadian kula kita enggo encidahken kebadian Dibata e.

APLIKASI
Perbahanen erlua-lua la saja encedai kebadian nggeluh, ras encedai hubungen ras Dibata. Tapi pe encedai kesehaten diri, ndehara, anak-anak, gereja bagepe masyarakat. Enterem kalak sakit erkiteken erlua-lua, sakit fisik, mental, ras initeken. Deba tersampati denga, sempat ngakuken kesalahen ras dosa-dosana. Tapi lit ka nge si lanai tersampati, pinakit ras dosana ndai mabai ia ku kematen.

Perlu ka si eteh maka si encedai kula labo saja arah erlua-lua tapi banci ka nge perbahanen si deban, umpamana; 1. Korupsi. Megati si begi arah media Televisi "Negara Idonesia ini mengarah kleptokrasi" ertina negara ipinpin kalak pinangko. Sienda terungkap erkiteken peminpin siniarapken jadi teladan justru ia nge si korupsi. Enggo ka pe ia jadi tahanen kenca lepas isanjung-sanjung desken sekalak pahlawan. Arah enda si idah maka melala otak manusia e sakit, lanai meteh si bujur ras si la bujur, kerina ngukuri dirina jine. Adi nguntungken man bana si salah epe ibelana. Adi nguraki keuntungenna, si bujur e pe ilawanna. 2. La disiplin ngaturken pangan, olahraga ras istirahat. Suari berngi encari, ndarami pangan si entabeh gelah megegeh erdahin, lanai ipernehen kandungen pangan e. Sekali erdahin, la ngadi-ngadi, sekali tunduh, tunduh lalap. La lit pengaturen waktu si mehuli.

Perlu si eteh maka njagai kesehaten eme pendilo Dibata man banta. Sehat perukuren, sehat perbahanen, sehat perkatan. Perlu si jaga sehat kula ras tendi ( sehat totalitas ). Dage bunuhlah biak-biak doni si la mehuli, umpamana; erlua-lua, erlagu la mehuli, peraten daging, sura-sura si jahat, bagepe rangap ( rangap e me nembah rnan berhala; bdk. Kol. 3:5 ). Alu bage kerina Mamre iarapken jadi penggerak kesehaten i bas jabu, gereja ras masyarakat. Arah kesehaten si mehuli, kita banci berwirausaha alu mehuli.
Selamat hidup sehat.

DISKUSI

Turiken pengangkandu kerna kalimat si ituriken Paulus, "bebas kap aku ngelakoken kai pe, tapi la ku pelepas kai pe engkuasai aku".
Bas penggejapenndu, lit nge hubungen berwirausaha ras kesehaten? Turikenlah!

Cataten:
Adi i bas PA enda lenga ibahan ceramah, mehuli ilakoken Mamre alu cara arih-arih Mamre sektor ras Mamre runggun lako erbahan ceramah hubungen berwirausaha ras kesehaten. Cakapken pe kerna tanggal ras inganna, penceramahna ras biaya siniperluken.

USULEN ENDE-ENDEN

KEE GBKP No. 192:1-3 ( Klik Judul Lagu Untuk Melihat Lirik Lagu )
KEE GBKP No. 317:1-3 ( Klik Judul Lagu Untuk Melihat Lirik Lagu )
KEE GBKP No. 323:1-3 ( Klik Judul Lagu Untuk Melihat Lirik Lagu )
KEE GBKP No. 316:1-3 ( Klik Judul Lagu Untuk Melihat Lirik Lagu )

Pdt. Nurbety br Ginting, M.Th

HP 082168696383