Kiniseran Yesus

Bahan Perpulungen Jabu-Jabu GBKP 24 Februari - 02 Maret 2019

Tema : KINISERAN YESUS (Matius 16:21-23)
(Minggu Passion)

Ngantusi erti kiniseran Jesus selaku "Mesias" labo mesunah. Kalak Jahudi labo iarapkenna maka Mesias si reh ku tengah-tengahna eme si ngenanami kiniseran. Si lit i bas pusuh ras perukurenna eme Mesias si megegeh secara doni, ngasup naluken imbang-imbangna secara politik, janah mbaba ketermurmuren bagi pernah inanamina sanga jaman Raja Daud. Erdandanken si e maka seh ku bas ujung pelayanen Jesus i babo doni enda labo ngasup kalak Jahudi ngaloken IA selaku Mesias, raja i bas kegeluhenna.

Perukuren ajar-ajar si enggo idilo Jesus bali nge ras kalak Jahudi si deban. Amin gia ikutkenna Tuhan tapi Ia iberena dirina ipelimbarui ntah pe iisi alu pengajaren Tuhan. Tetap denga teriket ku bas perukurenna jine. Si idah tupung Jesus nuriken maka nina,"Aku la banci lang lawes ku JerusaIem, la banci lang Kunanami erbage-bage kiniseran i bas pemimpin-pemimpin Jahudi, lmam-imam si mbelin ras i bas guru-guru agama Jahudi nari. Aku ibunuhna tapi i bas wori si peteluken ipekeke ka i bas si mate nari." Minter iawin Petrus Jesus alu arapen maka ula sempat jadi si e man baNa sabab bas perukurenna kiniseran e sada kinitalun. itulihken Jesus Petrus, nina "Laweslah i bas Aku nari o Iblisi lsidingindu kap Aku. Perukurenndu perukuren manusia labo perukuren Dibata."

Kata-kata Jesus i jenda ertina maka situhuna kiniseran e enggo ipadanken Dibata gelgel nari. Ratusen tahun sope Jesus ngenanami kiniseran seh mate pe enggo ernubuat nabi Jesaya i bas bindu 53:7- 8 nina, "Seh kal kejamna perbahanen man bana, tapi igengkenna, janah sinik saja ia. Bali ras anak biri-biri si nandangi igeleh, bali ras biri-biri si nandangi iguntingi mbuluna, la sitik pe ia sumekah. la itangkap, idabuhken ukumenna, jenari ibaba gelah iukum mate ia. Tapi la ise pe mperdiateken nasipna, aminna pe ia mate erkiteken dosa-dosa bangsanta." Enda me nubuat kerna Mesias si ngenanami kiniseran, e me perukuren ras peraten Dibata, maka Mesias e ngenanami kiniseran ras mate guna nebusi dosa-dosa manusia.

Erdandanken sie maka itulihken Jesus Petrus. Kata-kata Petrus e desken sada siding man Jesus. Ikataken siding eme godan si mbelin man Jesus. Erkiteken kata-kata si peseh Petrus ngatakenca "ula Kam ngenanami kiniseran e." Jesus jine pe ertoto i bas Peken Getsmani "adi banci ula min mentas calung e arah Aku." Calung ije eme gambaren kiniseran si bakal inanamiNa. Penidingi bagi si ibelasken Petrus enggo ndube leben ibelasken iblis. I bas Matius 4:1-11 maka ibaba iblis Jesus ku deleng si meganjang. Isuruhna itatap Jesus kerina kerajan doni enda. Nina iblis, "Kerina kinirajan doni ras kiniulinna ku bereken man baNdu tapi sembah aku." Kata-kata iblis enda ertina maka la perlu Jesus ngenanami kiniseran. Adi sembahNdu aku, la perlu mentasi kayu persilang. Genduari godan e reh arah ajar-ajarNa jine, emaka nina Jesus, "Laweslah i bas Aku nari iblis". Perukuren si meneken kiniseran Jesus i bas dahinNa doni enda eme bali ras perukuren iblis. Adi erdalan perukuren ibiis maka "penebusen nandangi manusia si perdosa e la tembe".

Si bengketi me Minggu-Minggu Passion i bas kalender gerejanta. Lit pitu minggu kita mperingetisa. I bas pitu minggu e me man kerina ngawan perpulungen guna ngerenungken alu mbages erti kiniseran Jesus ras kematenNa i bas nebusi dosanta. Maka situhuna kiniseran ras kematen Jesus e gambaren kiniseran ras kematen si arusna kita ngananamisa erkiteken dosa-dos anta. Tapi jine si erkiteken mekuah ate Dibata man banta maka AnakNa jine si iberekenNa guna nggancihken kita i bas ngenanami kiniseran ras kematen.

Arah kiniseran ras kematen Jesus ngatakenca man banta, kita itebus labo alu barang murahen. Kita itebus alu dareh Anak Dibata Si Tonggal. Enda encidahken uga tutusna ate Dibata nebusi dosa-dosanta. Alu bage maka ula nari min kita mesunah igoda iblis guna nadingken dalin Tuhan. Megati mesunah denga si akap ercakap I-ras , ngelakoken dosa. Megati Si begi ranan nina jaman "now" enda, "bage kalak kerina, adi la bage la kita dat jatah." Adi la ikut korupsi i bas sada kantor lanai kita ipake atasen. Gelah tetap ipake atasen uga nina bage ikutken amin e ertentangen ras pedah Dibata. Enda me salah sada dalan iblis ngajuk kita gelah la ndalani dalan kiniseran. Emaka si usur-usur denga rusur erban dosa e. Arusna maka adi Tuhanta pe pang ngenanami kiniseran guna kita maka kita pe pang ngenanami kiniseran i bas ndalanken peraten Dibata.

Emaka i bas Minggu-Minggu Passion enda radu ras kita kerina nadingken kegeluhen si dem alu dosa. Subuk i bas perukuren si melket, perbahanen si melitek, pengerana si merampek. Nggeluh kita i bas dalin Tuhan alu dem kiniteken, kekelengen ras pengarapen. Si cidahken maka kita kalak si enggo itebusi Jesus alu kiniseran ras kematenNa.

EVALUASI
Enggo nge si sikapken persembahenta i bas teptep kebaktin alu mehuli? Adi lenga terus cubaken guna kemulian Tuhan.

DISKUSI :
1. Kai ndia sebabna maka amin gia kita Kristen, tapi megati mesunah denga siakap ngelakoken dosa? 2. Kai ndia si ban gelah pang kita milih dalan Tuhan, amin gia banci kita jumpa kiniseran arah dalan e?

Aksi :
Sada minggu enda erlajar kita mersan kayu persilangta alu la jungut-jungut entah merawa amin gia lit la bagi ukurta.

USULEN LAGU :

1. KEE GBKP No. 149 : 1-2  ( Klik Link Untuk Melihat Lagu )
2. KEE GBKP No. 166 : 1-2  ( Klik Link Untuk Melihat Lagu )
3. KEE GBKP No. 272 : 1-    ( Klik Link Untuk Melihat Lagu )
4. KEE GBKP No. 212 : 1,5  ( Klik Link Untuk Melihat Lagu )

TOPIK PERTOTON SYAFAAT

• Gelah kerina ngawan perpulungen nggejapken erti kiniseran Jesus i bas geluhna. 
• Gelah ngawan pang nggeluh alu bujur. 
• Pemerintahta keleng atena rakyatna.

Share this post