Ersembah Man Dibata Alu Payo
BAHAN BIMBINGEN PJJ
Tanggal 4-10 Oktober 2026
(Mengenal Tuhan "Melalui Penyembahan")
BAHAN OGEN : Johanes 4:21-24
21. Nina Jesus man bana, “O bibi, teklah kam man bangKu. Reh me pagi paksana maka lanai kalak i deleng ah nembah Dibata bage pe lanai i Jerusalem.
22. Kam kalak Samaria si tuhuna la ietehndu ise si isembahndu, tapi kami kalak Jahudi ieteh kami ise si isembah kami, sabap Si Engkelini si ipadanken Dibata e reh arah kalak Jahudi.
23. Tapi reh me paksana, janah si tuhuna enggo seh pe, i ja arah Kesah Si Badia manusia ersembah man Dibata alu payo.
24. Dibata Kesah kap, e maka arah Kesah e ngenca maka banci manusia nembah Dibata alu payo.”
MODEL PJJ : KESAKSIN
KATA PERLEBE
Ersembah eme sada tanggung jabab kalak sierkiniteken guna nuduhken tanda keleng ete, kinihamaten ras ketaatan man Dibata. Erbage-bage cara ersembah setiap jelma tergantung ku bas tradisi, budaya entah pe kebiasan i bas agamana masing-masing. E maka labo banci sipeseri caranta ersembah ras kiniteken si deban. Tapi selaku kalak Kristen tentu lit ciri khas caranta ersembah man Dibata bagi si isuratken i bas Pustaka Si Badia. E maka arah bahan Pfinta sekali enda iajuk kita guna pebagesi pengangkanta uga kin ersembah si payo dingen singena ate Dibata.
ISI
Nats Joh. 4 :21-24 ngerana kerna konteks percakapen jesus ras diberu Samaria. Kalak Samaria eme keturunen campuren Jahudi ras bangsa si deban si menolak maka Jerusalem sebagai pusat ingan ersembah, janah igantikenna alu deleng gerizim jadi pusat inganna ersembah. Eme salah sada penyebab engkai maka kalak Jahudi la nggit berhubungen ras kalak Samaria (ay. 9). I bas ay. 20 nina diberu Samaria man Jesus: "nini-nini kami ersembah i datas uruk ah, tapi kalak Jahudi i Jerusalem me inganna ersembah man Dibata". Man kalak Samaria: gunung gerizim sebagai tempat kudus (Ul. 11:29, 27:12). Jahudi: Jerusalem dan Bait Suci sebagai pusat ibadah (2 Kro. 6:6).
I bas ay. 21-24, Jesus menanggapi penungkunen diberu e alu jawaben: ay. 21 "O bibi, teklah kam man bangku. Reh me pagi. paksana maka lanai kalak i deleng ah nembah Dibata bage pe lanai i Jerusalem". Arah nats enda ituriken Jesus maka seh me Pagi paksana kai si enggo ibahan manusia mengalami perubahen niaka lanai bo ingan tertentu si jadi pusat ersembah. Maka ingan ersembah pe lanai bergantung lokasi entah pe ingan tertentu, lanai i deleng Gerizim bage pe lanai i Jerusalem. Ay. 22: nuriken maka harus itandai ise kin si man sembahen, sabab kalak Samaria la itandaina ise kin isembahna. e maka itegasken Jesus mulihi tapi kalak Jahudi itandaina ise si isembahna. I bas ayat enda i tekanken maka i bas ersembah harus si tandai ise kin si isembah e. Alu penandai sipayo kerna Dibata em penembahen si sejati. Ay. 23: "tapi reh me paksand janah enggo seh pe...". Kitab Johanes menggambarken maka kerehen Jesus maba perubahen ku bas kerina dampar kegeluhen manusia termasuk cara ersembah sipayo. Lanai bo erpalasken ingan tapi "ersembah arah Kesah Si Badia" Kesah Si Badia eme simabai manusia, singajari manusia dingen simere pengangkaan sipayo kerna Dibata. Ay. 24: "Dibata kesah kap e maka arah kesah ngenca banci manusia nembah Dibata alu payo"arah enda ituriken maka Dibata eme kesah ertina tidak terbatas oleh ingan dan waktu. Erkiteken Dibata kesah maka penyembahen singena ateNa pe labo erkitekan ingan ras waktu tertentu tapi penyembahen secara pertendin entah pe roh.
PENGKENAINA
Temata eme: Ersembah Man Dibata Alu Payo. Adi ngerana kita cara ersembah maka pasti ermacam-macam cara setiap manusia bage pe i bas agama berbeda kerina cara guna ersembah. Termasuk gereja-gereja sigenduari erbage-bage model penyembahen i bas kebaktian, arah liturgi, arah lagu-lagu, bage pe erbahan ingan khusus si ianggap jadi ingan si badia. Tapi sijadi perenungen eme kap labo carana e si penting, entah pe inganna. Sipenting eme kap keyakinan ras penandaita ise siman sembahen e. Melala cara ersembah sigenduari iatur carana, lit deba alu keheningan, bersorak-sorak, janah kaipe arus lit tata tertibna ras si debanna sebagai keyakinen maka eme cara ersembah si payo, mungkin enda enggo jadi sada tradisi si mengakar i bas kegeluhen gereja. Tapi situhuna bagi situriken i bas ogenta ndai maka cara ersembah e lanai bergantung nandangi ingan saja, bahkan ijapa pe kita banci ersembah man Dibata, labo ngataken maka lanai kita perlu gereja sebagai tempat beribadah, gereja salah sada sebagai tempat ersembah tapi labo sebagai ingan si paling badia. Jesus nuduhken maka penyembahan sejati labo terikat budaya, suku, atau sistem agama entah pe ingan tapi simenentuken payo caranta ersembah e me kap sikap perukurenta tupung ersembah man Dibata si sentudu bagi singena ateNa.
Uga kin sikap perukuren si ngeNa ate Dibata? Eme perukuren si i ajari Kesah Si Badia. Labo erkiteken kiniulin manusia entah pe kinijagon manusia, tapi kalak siersembah arah kesah eme kalak sibersih perukurenna, iangkana kebenaren Dibata, si jadi pengalamen spiritual ras pe pusuh si merespon kehadiren kesah si Badia. Menurut Wayne Grudem: "roh kudus membantu orang percaya dalam penyembahan sejati karena roh memberikan pengertian dan kesadaan akan Allah yang benar melalui roh kudus penyembahan bukan menjadi rutinitas atau ritual kosong". Arah Kesah Si Badia mereken pengertin sipayo kai kin tujun nembah man Dibata, labo segelah enggo saja entah pe sebagai rutinitas. Bage pe menurut William Barclay: "menyembah dalam roh berarti penyembahan dalam aktifitas rohani bukan sekedar ritual fisik dan mengacu pada pemahaman benar tentang Allah yang telah dinyatakan melalui Kristus, dengan demikian penyembahan sejati terjadi ketika hati seorang dengan tulus dan berfokus pada Allah". Ersembah arah Kesah Si Badia sada bentuk ersembah erpalasken hubungen ras Dibata labo tradisi, mementingkan kedalaman hati labo hanya sekedar ritual saja. E maka Kesah Si Badia ngenca si ngasup ngajari manusia lako ersembah man Dibata alu payo sabab Dibata eme kesah.
Ijelasken Jesus maka Dibata e kesah. Ertina Dibata la terbatas man benda-benda saja, e maka ersembah man patung ntah gana-gana la payo. La terbatas i bas sada ingan tertentu. Jadi, erpengakap maka Dibata hanya banci isembah i Jerusalem ntah pe i Gerizim entah pe ingan-ingan si deban eme sada pandangan si salah. Erkiteken Dibata e kesah maka si isuraken Dibata i bas kita nari labo persembahen secara jasmani tapi rohaniah, si rehna i bas kesahta nari eme kekelengen, kesetian, kepatuhen, ras ketutusen.
Selaku kalak sierkiniteken, uga maka ngasup ersembah alu payo? Harus lebe sipesikap dirinta bagi singena ate Dibata, ngangkai kerna kebenarenNa si enggo ipeseh arah Pustaka Si Badia. Penampat i bas Kesah Si Badia nari ngenca banci nampati kita lako ngangkai kerna uga kin kebenarenNa e. Sabab kalak si enggo demi Kesah Si Badia eme kalak siersembah alu dem kiniteruken ukur, hidup dengan buah roh (kasih, sukacita, damai sejahtera, kesabaran, kemurahan, kebaikan, kesetiaan, kelemahlembutan, penguasaan diri), nggeluh i bas ketaaten nandangi kata Dibata. E maka segelah ula kita papak i bas kesah si labo rehna i bas Kesah Si Badia nari maka harus kita meteguh guna ngangkai, mendalami ras ngerenungken kata Dibata, tutus ras setia i bas ndalanken kata Dibata bage pe tutus i bas pertoton. Kita harus metenget nandangi kesah si lit i bas sekelewetta sabab melala kel "roh-roh" sibanci mabai kita ku dalan si papak. Terlebih i bas perkembangen jaman enda perukuren ras pemikirenta harus min ikuasai Kesah Si Badia sabab adi la kita mengandalken Kesah Si Badia e je me kita ibabai ku dalan si Iapayo iakap Dibata.
Sendalanen pe ras kai situriken Keith Aderson i bas bukuna "The Digital Cathedral" maka genduari i bas pekembangan jaman enda, membangun hubungen ras Dibata la hanya i bas gereja saja, tapi kujapa pe kita ringan kita banci ersembah man Dibata. Ersembah enda pe bentukna labo hanya ertoto, ku gereja, PJJ, er PA tapi pe encidahken biak-biak perbahanen singena ate Dibata i bas kegeluhenta tep-tep warina si erpalasken kebenaren Dibata.
DISKUSI :
1. Erpalasken ogen PJJnta, uga nge pemahamendu secara pribadi kerna ersembah arah Kesah selama enda?
2. Enggo nge kita ersembah arah Kesah man Dibata selama enda? Adi enggo, turiken bas kai saja, adi lenga, kai nge si jadi tantangenna?
USULEN ENDE-ENDEN:
1. KEE GBKP No. 348:1, 3, 6 ( KLIK JUDUL LAGU UNTUK MELIHAT LIRIK TEKS )
2. KEE GBKP No. 244:1,3 ( KLIK JUDUL LAGU UNTUK MELIHAT LIRIK TEKS )
3. KEE GBKP No. 245:1-3 ( KLIK JUDUL LAGU UNTUK MELIHAT LIRIK TEKS )
4. KEE GBKP No. 272:1- ( KLIK JUDUL LAGU UNTUK MELIHAT LIRIK TEKS )
DAFTAR BACAAN :
William Barclay, "The Daily Study Bible: The Gospel of John", Volume 1 (Edinburgh: Saint Andrew Press, 2001)
Wayne A, Grudem, "Systematic Theology: An Introduction to Biblical Doctrine",( Leicester: Inter-Varsity Press, 1994).
0 Response to "Ersembah Man Dibata Alu Payo"
Post a Comment