Ngangka Kerna Keleng Ate Dibata

BAHAN BIMBINGEN PJJ
Tanggal 27 September - 3 Oktober 2026
(Mengenal Tuhan: Doa)

BAHAN OGEN : Epesus 3:14-21

Keleng ate Kristus
14. Erkiteken si e maka aku erjimpuh i lebe-lebe Bapa.
15. I bas IA nari me kerina kinibapan i doni enda ras i Surga ndatken pengesahen.
16. Kupindoken man Dibata gelah i bas kinibayakenNa si la ersibar nari iberekenNa man bandu kuasa arah KesahNa guna mpegegehi pusuh peratenndu.
17. Janah gelah Kristus ringan i bas pusuhndu erkiteken kam tek man baNa. Ertoto aku gelah kam rurat dingen erpalas i bas keleng ate.
18. Gelah raduken kerina anak-anak Dibata ngasup kam ngangka kuga belangna, gedangna, ganjangna ras bagesna keleng ate Kristus e.
19. Tuhu, mbera-mbera ietehndu keleng ateNa e aminna gia keleng ateNa ngelebihi kerina pemeteh, seh maka kam idemi alu biak Dibata si serta.
20. Pujin man Dibata si ngasup erbahan kai pe ndauh beliden asangken ngasup kita mindosa ntah pe ngukurisa alu kuasaNa si sangana erdahin i bas kita.
21. Kemulian man baNa i bas perpulungen ras i bas Kristus Jesus, rasa lalap seh rasa lalap. Amin.

MODEL PJJ : PARTISIPATIF

KATA PERLEBE
Perbedan anak-anak ras kalak si enggo dewasa, selain secara fisik, si teridahna kal i bas pengangkan (pemeteh), ngantusi bage pe i bas menganalisa i bas muat keputusen. Sekalak anak perbahanenna lebih ku bas spontanitas sue ras perasanna sedangken sekalak si enggo dewasa tindakenna erpalasken pertimbangen-pertimbangen si payo i bas muat keputesen. I bas 1 Korinti 3:1-3, Paulus pe mandang perpulungen Korinti si biakna bage danak-danakna, si lenga dewasa i bas erkiteken, perukurenna si serap-serap ras erpihak-pihak dungna jadi perpecahan i bas perpulungen Korinti. Bage pe i bas surat Paulus man perpulungen Epesus ngidah maka pengangkan kerna keleng ate Dibata si payo eme hal si seh kal pentingna, erkiteken perpulungen si lenga dewasa rawan kal terjadi perpecahen ras banci monce kiniteken kune reh erbage-bage pengajaren si papak i bas internal bage pe eksternal. I bas bahan PJJ ta minggu enda pe, kita mpebagesi pengangkan kerna keleng ate Dibata, gelahna reh bagesna pengangkanta kerna keleng ate Dibata, gelahna seh kita ku tingkat kedewasaan i bas erkiniteken, lanai banci i jolah joleken kalak alu pengajaren si papak tapi erteguhna ras turah dingen rurat i bas Kristus.

ISI
Surat Epesus i tulis Paulus sanga ia ipenjaraken i Roma, sekitar tahun 60-62 Masehi. Si maba surat enda eme Tikikus (Ep.6:21-22) anak rohani Paulus. Epesus nai eme kota metropolitan si maju i bas ekonomi, infrastruktur bage pe pusat budaya Helenistik, Epesus gundari gelarna jadi kota Selcuk, provinsi Izmir, i negara Turki. Terkhusus i bas Epesus 3:14-21 isina eme pertoton sapaat Paulus man perpulungen Epesus, erkiteken perpulungen i Epesus si pernah i layani Paulus, lit i bas tangtangen kiniteken i bas pengaruh penyembahen dewa-dewa Artemis ras tantangen pengaruh penyembahen nandangi kaisar. Enggo kenca seh Berita Si Meriah i Epesus, pengerajin patung Artemis terancam erkiteken kurang lakona patung-patung ras koin-koin, simbol-simbol, dewa-dewi artemis erkiteken enggo ertentangen ras kiniteken kalak Kristen. Dewa-dewi artemis enda i percayai banci mereken kesuburen/kejuah-juahen man masyarakat Epesus, sibanci saja perpulungen Epesus ngolih ku kiniteken sidekah adi la paguh pengertinna kerna keleng ate Dibata.
I bas ay. 14-15, Paulus erjimpuh i lebe-lebe Bapa, i bas IA nari Surga ras i doni ndatken pengesahen. Paulus mereken pengangkan man perpulungen i Epesus maka alamat toto eme Bapa si erkuasa i doni ras i Surga. Enda i pertegas Paulus maka Bapa si isembah Paulus la seri ras dibata-dibata si sembah kalak Epesus eme dewa-dewi Artemis, si kuasana seh kal terbatasna ras la lit kuasana i doni ras i Surga. E maka i bas ayat 16, ipenangkih Paulus•pemindonna man Dibata gelah perpulungen Epesus megegeh pusuh peratenna ncikep kiniteken man Jesus Kristus, la mobah amina gia lit pengajaren si papak. Paulus pe tek, amina gia la jumpa ia perdempak ayo ras perpulungen, lit Kesah si Badia si la ersibar kuasaNa ngasup mpegegehi pusuh perpulungen Epesus tetap setia erkiniteken man Kristus. (Ay. 17) Paulus mereken pengertin maka kiniteken si erbahanca Kristus ringan i bas pusuh manusia erkiteken Kristus ringan i bas pusuh nge maka banci rurat dingen erpalas keleng ate. ljenda Paulus menegasken maka ula erdua dibata, cukup erkiniteken man Kristus, ula tek man dibata-dibata si deban.
I bas ay. 18, irakut Paulus pengertin kerna pegangkan si payo maka Kristus si enggo ringan dingen rurat i bas pusuh peraten manusia njadiken kerina anak-anak Dibata banci ngasup ngangka kuga belangna, gedangna, ganjangna ras bagesna keleng ate Kristus. Uga belangna, gedangna, ganjangna ras begesna keleng ate Kristus, Paulus ngidah e kerina i bas kiniseran, kematen Jesus i kayu persilang. Kai si ibahan Jesus lalit ise pe ngasup ngelakokenca, IA mate man kalak perdosa. Tan Jesus sitalang i bas kayu persilang e bukti uga belangna keleng ate Bapa man kerina manusia la sada pe erpilihen subuk kalak Jahudi bage pe si la kalak Jahudi atan ndatken keleng ate Bapa. Uga gedangna keleng ate Bapa, e teridah i bas kiniseran jesus si setia mersan silang seh ku Golgota. Uga ganjangna e banci si idah Bapa i Surga nari pesusur anakna si tonggal ras uga bagesna keleng ateNa ertima nandangi kerina kalak perdosa gelah mulih kempaksa. I bas ay. 19, Paulus nuriken i bas totona ngangkai keleng ate Dibata la banci ipake salu pengertin manusia tapi harus rehna arah pengajari Kesah Si Badia erkiteken ngangkai keleng ate Dibata la ngasup pengertin ras pemeteh manusia ngangkaisa. E maka nina Paulus, Kristus si ringan i bas kam erbanca biak-biak Dibata ndemi pusuh peraten arah si seh ku bas pengertin si serta/dewasa, ngangkai keleng ate Dibata. I bas penutup toto Paulus (20-21), ipenangkihna pujin man Dibata maka pengangkan kerna keleng ate Dibata e tuhu-tuhu terbatas i bas manusia janah kuasa Dibata ngenca ngasup mereken pengertin si payo maka tuhu-tuhu iangka manusia maka keleng ate Bapa, e lit i bas anakNa si tonggal si mate guna penebusen dosa-dosa manusia. Janah itutup Paulus totona kemulian man Jesus Kristus si enggo engkelengi manusia seh rasa lalap.

PENGKENAINA
I bas bahan PJJ ta minggu enda, mabai kita ku bas pengertin si payo kerna keleng ate Dibata i bas kematen Jesus Kristus. Gelahna ula salah pengangkanta erkiniteken man Dibata, sabab lit kalak erkiniteken ukurenna i bahanna emekap pasu-pasu Dibata, adi tambah rejekina akapna keleng ate Dibata maler man bana, bage ka sebalikna adi lenga dat rejeki akapna pasu-pasu Dibata kurang man bana. Ijenda si idah maka keleng ate Dibata emkap i bas kiniseranna ras kematenna i kayu persilang si lanci ibandingken alu kinibayaken ras pemere si rehna i bas doni enda nari. Jadi ukuren keleng ate la banci ukurenna nandangi kai si aloken kita i bas doni enda tapi sebalikna kai si dat kita i bas Bapa i Surga nari emekap iberekenNa anakNa si tonggal guna nebusi dosa- dosa manusia. Keleng ate siberefken Dibata man manusia lanai bo lit si banci njuluisa, erkiteken Keleng ate Dibata kap si belangna, si gedangna, si ganjangna ras begesna asangken kai si bere doni enda.

DISKUSI
1. Uga nge pengangkanta kerna kuga belangna, gedangna, ganjangna ras begesna keleng ate Kristus man manusia (ay.18)?
2. lbas kita ertoto, uga ngge pengalamenta adi ikawitken ras temanta kerna ngangkai keleng ate Dibata.

USULEN ENDE-ENDEN:
1. KEE GBKP No. 204:1-3 ( KLIK JUDUL LAGU UNTUK MELIHAT LIRIK TEKS )
2. KEE GBKP No. 224:1-3 ( KLIK JUDUL LAGU UNTUK MELIHAT LIRIK TEKS )
3. KEE GBKP No. 345:1-2 ( KLIK JUDUL LAGU UNTUK MELIHAT LIRIK TEKS )
4. KEE GBKP No. 227:1-2 ( KLIK JUDUL LAGU UNTUK MELIHAT LIRIK TEKS )

DAFTAR BACAAN :
Guthrie, Donald, Pengantar Perjanjian Baru Volume 2, Surabaya: Momentum,2010
O'Brien, Peter T, Surat Efesus, Surabaya: Momentum, 2013

Pdt. Insan Sinurat, M.Th

HP/WA: 081288131248