Ersada Arih Guna Nampati

Bahan Bimbingen PA Moria
Tanggal 20-26 September 2026
Wujud Mengasihi Allah Terlihat Dalam Gereja

SI MAN OGEN : Roma 15:22-29

TUJUN : Gelah Moria:
• Meteh perjuangen perpulungen Makedoni ras Akaya.
• Nampati teman si sakit menahun i bas runggun.

METODE PA: Diskusi ras aksi

Kata penaruh
Kitab Roma isuratken Paulus man perpulungen Roma i bas tahun 55-60 kenca Masehi. Paulus labo si manteki perpulungen i Roma. Perpulungen enda lit ulih pertobaten kalak Jahudi ras si la Jahudi asum Pentakosta. Roma 15 e me bagin pendungi kitab enda, nuriken maka Paulus sangana i bas perdalanan misi. Ia melala ngelakoken erbage pelayanen man kalak si la Jahudi. Bagi si eteh pelayanan Paulus buen kin man perpulungen si la Jahudi. E maka mbelin kal sura-sura Paulus i bas sada paksa banci singgah ku perpulungen Roma. Ate Paulus asum ia pagi ngelakoken pelayanen ku Sepanyol banci ia singgah ku Roma. Adi si oge Perbahanen Rasul 28:16-31 maka si idah i je isuratken maka Paulus nggo seh Roma. Ia tading i bas rumah sekalak Roma ras banci meritaken berita si meriah.

Mpebagesi Pengangkan Kerna Ogen
Paulus encidahken sada biak perpulungen e me si tedehen. Paulus i bas kerina keterbatasen rikutken pinakit si lit i bas ia tapi tetap atena tedeh man perpulungen e. Seh maka ipala-palaina guna banci jumpa ras perpulungen Roma. Kenca si e Paulus pe nuriken kerna kai si sangana ilakokenna e me berkat ku Jerusalem guna mpeseh penampat si rehna arah perpulungen Makedoni ras Akaya. Perpulungen si i Jerusalem melala kal musil. Melala la nari erdahin erkiteken erkiniteken man Jesus, ipedauh i bas persadaan kalak Jahudi, erkiteken nggo iakap lalar/sesat. Ngidah situasi enda me maka dua perpulungen Makedonia ras Akaya alu dem keriahen nggit nampati.
Duana perpulungen enda ndauh sirang bas Jerusalem nari. Banci jadi Paulus nge si mpebetehken kerna kecibal perpulungen e asum paulus reh ndahi perpulungen e duana. Perpulungen Makedonia ras Akaya teremen kalak Junani sabab dua kota enda lit i bas wilayah Junani. Tentu beda ka nge ras Jerusalem si buen kalak Jahudi. Secara ekonomi perpulungen Makedoni labo perpulungen si bayak, (2 Korinti 8:2). Paulus ngataken perpulungen enda musil tapi melumbar mere. Perpulungen enda nggejapken amin gia melala perbedan ras perpulungen si i Jerusalem tapi erkiteken persadanna selaku gereja si tuhu-tuhu, alu meriah ukur duana ia nampati. Gereja labo persadan suku, entah pe wilayah saja tapi belinen asa si e, e me persadan kalak si tek man Tuhan Dibata.

Pengkenaina
   Kees De Jong sekalak dosen teologi Belanda pernah ngataken maka gereja e me bangsa Dibata si erdahin guna ngelakoken misi Dibata. Tentu melala kal misi Dibata, nehi keadilen, nuriken si benar, ngelakoken kekelengen ras si debanna kerina. Arah pengertin enda oratna min gereja jadi usihen sipemena man doni enda kerna nampati ras encibalken kekelengen. Pas bagi lagu Harto Tarigan "rumahta e gelarna nge kitik tapi kekelengen e roncah-roncah i basna." Bage me gereja selaku persadaan kalak si tek arus ersada encidahken misi Dibata e.
   Gereja si nggeluh e me gereja nggeluhi persadanna (koinonia) si teridah arah kengasupen ersaksi (marturia) dingen encidahken kekelengen (diakonia). Tri tugas gereja si erdalan alu mehuli encidahken gereja e nggo sue ras pengertin gereja si tuhu-tuhu. Temanta wari enda ngerana kerna ersada arih guna nampati. Gereja e me persadan kalak si ersada arih erkiteken kiniteken man Jesus. Perpulungen Makedoni ras Akaya ersada arihna duana aminna pe la sitandan, bage pe labo ka pernah tandaina perpulungen Jerusalem. Aminna pe la sitandan, la engkurangi semangatna nampati. Teridah tuhu buah kiniteken duana perpulungen e. I bas kinata kegeluhenta lako nampati, perlu lebe si eteh si man sampaten e. Ise kin e, anak ja kin e ras penungkunen si debanna. Situhuna si bage la encidahken kita ersada i bas kiniteken.
  Nampati e me bentuk kekelengen. I bas doni si dem alu kesusahen ibabai kita terus encidahken dahin gereja, e me ngelakoken pendahin Dibata. Nampati la terjeng mereken keperlun kalak si deban. Tapi banci jadi alat Dibata guna ngaloi toto kalak si susah. Ertoto kal ia sanga susah e, sampat aku Tuhan nina. Asum kita reh dingen mereken penampat i je me igejapkenna totona ialoi Dibata. Kalak si bage tentu tambah kal kinitekenna sabab igejapna maka totona ialoi Dibata. Nampatilah kita gelah arah penampatta teman si sampati kita ngejapken kekelengen Dibata.

Diskusi
Moria ibagi ku bas dua kelompok; sada kelompok perpulungen Akaya ras Makedonia, sada nari kelompok perpulungen Jerusalem. Perpulungen Akaya ras Makedonia njabab penungkunen No. 1 ras perpulungen Jerusalem njabab penungkunen No. 2. No. 3 radu ras erbahan aksina.
1. Adi kita jadi kalak Makedoni ntah pe Akaya, engkai maka nggit kita nampati perpulungen Jerusalem si labo si tandai?
2. Si bayangken kita jadi perpulungen Jerusalem si ngaloken penampat, uga pengejapenta asum ngaloken penampat? (bagi bas dua kelompok sada Makedoni Akaya sada nari Jerusalem)
3. Marilah sibahan aksinta nampati teman sisakit menahun. Pemena sidata temanta si sakit menahun subuk i sektor bage pe bas runggun. Kenca si e arihken kai banci silakoken guna mpenahangi entah nampati ia (materi, toto, perhatin ras sidebanna). Tentuken waktu/target si erkelanjuten seh maka tuhu-tuhu igejapkenna kekelengen e mbages kel ngaruhna.

Pdt Jefri Alexander Keliat

Minggu si reh sipepulung kolekte ekstra guna LAI