Patuh Ndalanken Persuruhen Jesus

BAHAN BIMBINGEN PA MORIA
Minggu, 26 Juli - 01 Agustus 2026
Wujud Kasih Kepada Allah melalui Ketaatan

SI MAN OGEN: Lukas 5:4-11

4. Kenca dung IA ngajar nina man Simon, “Baba perahundu tertengahen ku ingan si mbages. Amburkenlah jalandu guna nangkap nurung.”
5. Ngaloi Simon, “O Guru, sada berngi enda latih kal akap kami erdahin, kai pe la lit dat kami! Tapi adi Kam kal nuruhsa banci kuamburken jala e.”
6. E maka iamburken kalak ndai jalana janah melala kal datsa nurung seh maka merigat atena jala ndai.
7. E maka ikiapi kalak enda teman-temanna si lit i bas perahu si sada nari ndai gelah reh nampati. Reh kalak ndai janah isina perahu e duana seh dem, janah menam gedap pe.
8. Kenca idah Simon Petrus kai si enggo jadi, erjimpuh ia nembah man Jesus nina, “O Tuhan, laweslah Kam i bas aku nari! Aku kalak perdosa kap!”
9. Mamang ate Simon Petrus ras teman-temanna perbahan melala kal nurung si idatsa e.
10. Bagepe temanna anak-anak Sebedeus e me Jakup ras Johanes. Nina Jesus man si Simon, “Ola kam mbiar, mulai genduari nari kam jadi penjala jelma.”
11. Kenca ikayuhna perahu e ku tepi, e maka itadingkenna me e kerina, jenari ikutkenna Jesus.

TEMA : Patuh Ndalanken Persuruhen Jesus

TUJUN: Gelah Moria:

Meteh kecibal ajar-ajar paksa si e.
Maba sada teman Moria si kurang aktif reh ku PA Moria.

METODE PA : Games ras Aksi

Kata Penaruh
Kata "Puji Tuhan" megati sibegi ibelasken kalak Kristen tupung jadi bagi sura-sura i bas kegeluhen. Tapi "Puji Tuhan" merari sibegi adi reh mara ntah pe kegagalen. Si enda encidahken maka megati saja kinitekenta man Dibata itentuken situasi kegeluhenta, adi sikap geluhta paguh kinitekenta, tapi adi la sikap geluhta enggo mulai siraguken keleng ate Tuhan. Pengangkan si bagenda rupa tentu mbelin ngaruhna nandangi kepatuhenta man Dibata.
Kitab Lukas itulisken guna nuriken maka Jesus me si engkelini bangsa Israel si ipadanken Dibata, bege pe si engkelini kerina manusia. Penulis Lukas enda mulihi nuriken kerna kejadin-kejadin si enggo jadi itengah-tengahna. Kenca enggo ipepayona alu megermet i bas mula-mulana nari, e maka mehuli iakapna guna nuratkenca alu ratur man kalak si ngogesa.

Mpebagesi Pengangkan Kerna Ogen
   Ogenta wari enda nuriken kerna Jesus milih ajar-ajar si pemena i dano Genesaret. Sanga si e iidah Jesus Simon ras temanna sangana nikapken jala i datas perahu si enggo ngadi i tepi dano. Idatasi Jesus perahu e janah isuruhNa isorong Simon sitik ku lau nirangken tepi dano, janah i je nari me Jesus ngajar man jelma si enterem. Kenca dung ngajar isuruh Jesus Simon maba perahuna tertengahen lako nangkap nurung salu jala (ay. 4). Ngaloi Simon maka segedang berngi enggo latih kel iakapna erdahin tapi kai pe la idatna, tapi adi Jesus nuruhsa iamburkenna me jala e (ay.5). Tangkas teridah maka kecibal ajar-ajar paksana putus asa dingen latih erkiteken pendahinna la rulih. Tapi, i bas situasi latih dingen putus asa enda tetap denga ia patuh man Jesus. Situhuna banci saja Simon la nggit ngamburken jala erkiteken segedang berngi enggo ilakokenna tapi la lit ulihna. La isimbak ras la ibelinkenna alasenna, tapi ipatuhina Jesus lako maba perahuna tertengahen janah ngamburken jalana. Biak si patuh man Jesus nggeluh i bas diri Simon.
   Kalak si patuh man Tuhan labo sia-sia. Teridah maka kenca iamburken Simon jalana melala nurung idatna seh merigat atena jalana (ay.6). Ban buena nurung si idatsa maka idilona temanna i bas perahu si deban nampati ia janah dem duana perahuna, menam gedap pe (ay.7). Kuasa Jesus la terjului manusia, si la mungkin iakap manusia, mungkin i bas Dibata. I bas buena nurung itangkap Simon encidahken maka i bas Jesus lit kuasa i bas darat, langit, bage pe lawit. Igejapken Simon pe kinimbisan Jesus e seh maka erjimpuh ia "laweslah i bas aku nari, aku kalak perdosa (ay.8). Biak meteruk ukur icidahken Simon i bas bagin enda, igejapkenna maka kitik ia iadep-adepen Jesus. Biak meteruk ukur e me jadi palas kepatuhen man Dibata.
   Kepatuhen Simon man Jesus tuhu-tuhu paguh. Si enda teridah maka kenca ikataken Jesus "ola mbiar, mulai genduari nari kam jadi penjala jelma" (ay.10), itadingken Simon kerinana, janah ikutkenna Jesus (ay.11). Kenca iidah Simon kuasa Jesus, lanai ia erdua-dua ukur ngikutken Jesus, janah teridah i jenda kepatuhenna man Jesus nalihken pengarapen si bene mulihken erpengarapen.

Pengkenaina
   Patuh i bas Kamus Besar Bahasa Indonesia ertina: taat, tunduk, turut perintah dan aturan orang lain. Manusia ngasup patuh man Dibata adi akapna siikutkenna e lit gunana man dirina ntah pe sue ras kai si iukurkenna. E maka kepatuhenta pe banci saja bagi kapal selam "timbul tenggelam". Bahan PA nta sekali enda ngajuk kita lako ngidah ulih kepatuhen kalak si erkiniteken lako ndalanken persuruhen Tuhan i bas kerina situasi kegeluhen. Moria si patuh man persuruhen Jesus e me Moria si erkiniteken. Erkiniteken i bas Heber 11: 1 nina "tek nandangi kai si iarapken, janah tek kerna kai si la idah." Alu bage kepatuhenta nandangi Dibata arus sendalanen ras kinitekenta nandangi perbahanen Dibata si lenga siidah. Patuh man Dibata e la erkune-kune. Ula mis si ban datna sura-sura Dibata e adi lenga sidalani, sabap banci saja si la bagi ukurta ban Dibata jadi kite-kite ku dalan si jore.
   Kegagalenta i bas geluh enda, ula erbahansa kita sirang ras Dibata. Tetaplah patuh i bas kerina paksa, maka siidah uga kinimbisanNa bas geluhta. Moria si patuh man Tuhan arus meteruk ukur. Kiniteruken ukur e me kunci kepatuhen: sabap mesera kel siakap ngikutken kalak si deban adi beluhen siakap kita asangken ia.
   La lit kepatuhen man Dibata si sia-sia, sabap kerina sura-sura Dibata man banta e me guna kiniulinta. Sura-sura Dibata e me gelah kita senang, labo gelah cilaka, e me mereken wari sipepagi bagi si iarapkenndu (Jer 29:11). Gelah tuhu-tuhu banci kita ndatken kesenangen, mari sidalanken pedah Dibata i bas kegeluhenta alu lanai erdua ukur. Kepatuhenta e teridah i bas setia ndahiken kerina dahin gereja bage pe ndalanken si ngena ateNa i bas geluhta. Tek kita maka arah kepatuhenta man Dibata, kita ndatken pasu-pasu guna jadi pasu-pasu man enterem jelma. Adi ras Tuhan: "Jalani Proses tanpa protes, pasti sukses!"

Games ras Aksi
1. Games
Bagi Moria per kelompok (5-10 kalak per kelompok), jenari tiap kelompok erbaris ergedang ku pudi. Pemimpin PA erbahan aturen gelah kerina kelompok ndalanken perentah adi lit kata kunci "nina Jesus" arah lebe, tapi adi la lit kata "nina Jesus" la banci ilakoken. Contoh: adi "nina Jesus tedis" kerina arus tedis, tapi adi "kundul" ningen saja, la lit kata "nina Jesus" la banci kundul.
2. Aksi
Teptep Moria maba sekalak teman si la reh PA guna reh er- PA minggu si reh.

Pdt. Rasmalem Br Ginting