Sikeleng-Kelengenlah Alu Tutus - Penjemaaten Unit Pelayanen Diakonia ( Bahan PJJ 27 Oktober - 2 November )

Bahan Bimbingen Perpulungen Jabu-Jabu 27 Oktober - 2 November 2019

Sikeleng-Kelengenlah Alu Tutus

Penjemaaten Unit Pelayanen Diakonia

Ogen : 1 Petrus 4:7-11

Pengurus si mehuli kerna pemere Dibata
7. Kerina si nasa lit enggo ndeher kedungenna. Dage kuasailah dirindu janah petenenglah ukurndu gelah ngasup kam ertoto.
8. I babo si e kerina, sikeleng-kelengenlah kam alu tutus, sabap keleng ate namburi melala dosa.
9. Metemue lah kam alu la jungut-jungut.
10. Sekalak-sekalak, selaku pengurus si mehuli i bas pemere Dibata si pelain-lain e, si iberekenNa erpalasken lias ateNa, arus nggunaken pemere e guna kiniulin kalak si deban.
11. Kalak si ngerana, ngeranalah alu kata-kata si tempa-tempa rehna i bas Dibata nari. Kalak si nampati, isampatinalah kalak alu gegeh si ibereken Dibata man bana, gelah i bas kai pe ipuji kalak Dibata arah Jesus Kristus. IA me si mada kemulian kuasa seh rasa lalap. Amin!

Rasul Petrus salah sada saksi si ngidah pelayanen bage pe kiniseran Jesus. Petrus nerusken dahin pelayanen si enggo ibahanNa man enterem jelma. Petrus nehken berita keselamatan e i bas piga-piga ingan i Pontus, Galatia, Kapadokia, Asia kitik ras Bitinia. I bas ogenta ndai, Petrus ngajuk perpulungen gelah nehken kekelengen sebab enggo ngaloken keselamaten i bas Dibata nari.

Ngerana kerna kekelengen, perlu siinget kai si enggo ibahan Jesus tupung la nggeluh denga. Amin melala pe percuban ras kiniseran si reh man Jesus tetap isehkenNa kekelengen. Ope Jesus mate pe, ipersingetiNa denga ajar-ajarNa gelah tetap ia sikeleng-kelengen sada ras si debanna, sebab nandangi melala me perbeben si man alanken. Erkiteken si e me perlu ia sikeleng-kelengen ( bdk. Joh. 15: 1-20;13: 34,35 ). Persinget sinisehken Jesus e me sinicikep Rasul Petrus. Kujapape ia, rusur ipersingetina perpulungen maka kekelengen Jesus enggo ialoken erkelangken kematenNa. Kalak si enggo ngaloken Jesus Kristus, nggeluh i bas kegeluhen si mbaru. Kegeluhen si male enggo lepas, bagi kerincuhen daging, mabuk-mabuk, pesta minem-minem, nembah berhala bagi tersurat i bas I Petrus 4 : 3.

Kenca nggeluh i bas kegeluhen si mbaru, lit siperlu terus ilakoken eme ertoto dingen nehken kekelengen alu tutus. Ertoto eme Persadan ras Dibata. Manusia ngerana ras Dibata nehken Pengataken bujur, pemindon pengkawaliNa ras pengarapenna. Dibata ndengkehken pertoton (bdk. Msm. 4:3, 65:2; Mat. 7:7,8,11, Joh. 14:13-14). Persoalen si man alanken paksa si e, eme beratna ancamen ras tantangen nandangi kalak Kristen, emaka tempa-tempa lanai ngasup perpulungen nehken pertoton. Eme sebabna Petrus terus njemba ras mpegegehi perpulungen gelah ngasup ertoto. Guna si e, lit dua pemindon Petrus, eme: "kuasallah dirindu" janah "petenenglah ukurndu" gelah ngasup kam ertoto". Ngkuasai diri ras ketenengen rukur mbageskal kawitenna. Perpulungen perlu ngkuasai diri i bas pengajuk gelah ula mulihken ka ku bas kegeluhen si ndekah, mabuk, minum, nembah man berhala. Sabab eme tantangen si mberatna, tantangen si reh i bas dirinta nari. Igejap Petrus maka adi perpulungen la tenang, la ngkuasai diri, maka labo ia ngasup ertoto, ngerana ras Dibata.

Kenca kita ertoto ku Dibata alu lebe ngkuasai diri ras peteneng ukur, emaka i bas ogenta nina: "ibabo si e kerina perpulungen arus sikeleng-kelengen alu tutus (ay 7). Arah kata "ibabo si e" nuriken maka nehken kekelengen e me sipentingna. Nehken kekelengen alu tutus man kalak si deban banci silakoken adi kalak si deban e bali siakap ras dirinta. Bagi nina Jesus i bas Matius 22:39 nina: "Kelengilah temandu manusia bagi kam ngkelengi dirindu". Nehken kekelengen alu tutus eme nehken kekelengen si lanai mementingken diri sendiri, umpamana: metemue alu la jungut-jungut, ngerana alu payo, nampati alu gegeh Dibata. Engkai kin maka bage gegehna Rasul Petrus mindo gelah perpulungen nehken kekelengen alu tutus? Sebab Dibata e kekelengen kap (bdk. 1 Joh. 4:16; Joh. 3:16). Kekelengen Dibata kap ndube si njemba Jesus reh ku doni enda. Kekelengen Dibata e me sierbahanca kalak si tek ndatken kegeluhen si rasa lalap. KekelengenNa e guna kiniulin doni enda (bdk. 1 Joh. 3:18). I bas si telu enda, kiniteken, pengarapen, kekelengen, simbelinna eme kekelengen (bdk. 1 Kor. 13: 3, 13). Kekelengen biakna la ermasap-masap (bdk. 1 Kor. 13:8).

I bas minggu penjemaatan Unit Pelayanan Diakonia enda, perlu si lakoken Kata Dibata enda. Megegeh min kita ertoto guna kerina unit pelayanan Diakonia GBKP, janah reh tutusna ateta nehken kekelengen man bana.Unit Pelayanan Diakonia GBKP salah sada inganta guna mpepaler pasu-pasu Dibata si lit i bas kita. Tanggungjawabta kap gelah Unit pelayanan Dikonia erdalan alu mehuli (data-data kerna unit pelayanan diakoni GBKP terlampir).

Kebutuhen si perlu terus sidukung eme uis, pangan, pendidiken, lapangan pekerjaan man anak Gelora Kasih, anak-anak lingkar Sinabung si enggo tamat kuliah. Terus mpehuli ras ngernbangken fasilitas asrama ras gedung Gelora Kasih, Alpha Ornega, Bagepe pemasaran hasil produksi pertanian, peternakan, kerajinan tangan si lit i bas kerina Unit Pelayanan Diakonia. Kerina pengurus Diakonia Sektor, Bajem, Runggun, Kategorial, Klasis ras ngawan perpulungen ras-ras nehken kekelengen man unit pelayanenta enda.

I bas ayat si perpudina, idungi Petrus kata Dibata e nina: kerina kekelengen sisehken kita alu tutus guna kemulian Dibata kap. Labo gelah kita dat pujin. Arah kekelengenta kalak si deban muji Dibata, janah gelah i bas kai pe ipuji kalak Dibata arah Jesus Kristus. Ia me si mada kemulian kuasa seh rasa lalap.

EVALUASI
Enggo nge silakoken aksi pengataken bujur nandangi panitia pemilihen pertua diaken?

DISKUSI

Turiken uga kin erti nehken kekelengen e man banta ras man kalak si deban.
Arihkenndu bentuk kekelengen si kuga banci irencanaken tah pe ikembangken guna idalanken I bas: Diakonia Runggun bage pe man Unit Pelayanan Diakonia se-GBKP. Adi perlu kam penjelasen lebih lanjut banci ihubungindu nomor HP si enggo ilampirken.

AKSI
Bahan aksi PJJnta i bas mperdiateken ras nampati unit pelayanen diakonia si lit bas gerejanta.

USULEN LAGU :