Metenget Dingen Makeken Kesempaten Alu Mehuli - Bahan Bimbingen PA Moria 7 - 13 April 2019

Bahan Bimbingen PA Moria 7 - 13 April 2019

HUT KA-KR GBKP

SI MAN OGEN : 1 Petrus 1:13-17

Kegeluhen si mbaru man anak-anak Dibata
13. E maka sikapkenlah ukurndu katawari pe. Metengetlah dingen tuhu-tuhu lah erpengarapen nandangi pasu-pasu si pagin ibereken Dibata man bandu, sanga kerehen Jesus Kristus ku doni enda.
14. Erkemalangenlah man Dibata, janah ola pelepas geluhndu ibabai sura-surandu si ndekah, e me sura-sura paksa kam langa erpemeteh kerna Dibata.
15. Tapi badia min kam i bas kerina perbahanenndu, bagi Dibata si ndilo kam pe badia kap.
16. I bas Pustaka Si Badia ikataken Dibata, “Kam arus badia, sabap Aku pe badia.”
17. Tupung kam ertoto man Dibata, ikatakenndu IA Bapa. IA me si ngadili kerina manusia alu la erndobahen rikutken perbahanen sekalak-sekalak. Erkiteken si e pakeken kesempaten si lit guna pemuliaken Dibata, kidekah kam nggeluh denga i doni enda.

T E M A : METENGET DINGEN MAKEKEN KESEMPATEN ALU MEHULI.

T U J U N : Gelah Moria:

• Ngangkai isi teks kerna metenget i bas kegeluhen dingen tetap erpengarapan nandangi pasu-pasu Dibata.
• Pentar makeken kesempaten guna Dibata, dahin ras jabu (keluarga). 

METODE PA : Diskusi, aksi ras nobar.

Kata Penaruh. 
Genduari enda la terpersoken maka la sitik orangtua si kelsehen nangdangi lagu langkah anak-anakta. Enggo tambah pemeteh ras pengkebetna si la bagi ukur orangtua. Lanai megiken kata, atena peratenna, kecibal si enda la saja kelsehen ulihna tapi pe lit si enggo mpeturah pinakit. Adi si pergermetken situhuna lit dua "gegeh" si erbahansa bage, eme: si pemena pengaruh jaman enda: i ja teknologi reh canggihna, reh mesunahna erkomunikasi, informasi reh pedasna si eteh. Si peduaken, kurangna waktunta ras anak-anakta si erbahansa anak-anakta murah terpengaruh ku bas kejahaten. Erkiten sie perlu kita metenget nandangi situasi si terjadi paksa enda. Arah bahan PA-nta, ibabai kita gelah metenget i bas makeken kerina kesempaten ras situasi mehuli.

Mpebagesi Pengangkan Kerna Oqen.
Surat Petrus si pemena, ialamatken man kalak Kristen si merap i belang-belang bagin utara Asia kitik tupung sie. Kalak Kristen sangana i ayak-ayak dingen ngenanami kiniseran erkiteken kinitekenna man Jesus. Emaka tujun surat enda si tuhuna mpegegehi ( mpepiher ) ukur kalak si ngogesa. Lit telu gegeh si ncedai kegeluhen kalak Kristen ( tupung sie ). Si pemena, Tahun Judaisme ( kini Jahudin ) si la setuju nandangi kehadiran / pengajaren Tuhan Jesus. Si peduaken, kekaisaren Romawi si erpengakap maka pengajaren kekristenen ngganggu perdalanen ( stabilitas ) kekuasaanna. Sipeteluken, pengajaren Filsafat Junani si megati mpersilahang Dibata. Erkiteken si e perpulungen perlu ipegegehi ras ibentengi. Enda me kecibal perpulungen si jadi alamat surat Petrus si pemena. Tujun surat e itulisken gelah perpulungen ulanai min kinitekenna e mulihken ku sideban. Kalak si tek arus njaga kebadian dirina bagi Dibata badia, lanai ipengaruhi pengajaren sekelewetna. Nggeluh erbahan ukur Dibata senang sabab geluh kalak si tek e enggo ipelimbarui bagi Kristus. Dibata mereken kesempaten guna mpermuliaken dirina. Tu gas kalak si tek makeken kesempaten e alu mehuli.

Enda me si ikataken geluh erpengarapen man Dibata. Perpulungen si paguh dingen nggeluh bas kiniteken ngasup mpertahanken jati dirina. Buktina, ngasup kalak enda meritaken kekristenan seh ku belang-belang Eropah bage pe ku tampuk doni.

Pengkenaina.
Bulan enda si peringeti HUT KAKR GBKP, sendalanen ras HUT GBKP, sabap tanggal 18 April 1890 i peridiken me 5 kalak Karo si jadi Kristen, i bas si e lit 2 kalak anak-anak. Emaka sekaligus ibahan tanggal enda tubuhna KAKR GBKP. I bas tahun enda umurna enggo 129 tahun. Nginget enggo belinen umur KAKR enda, perlu si siksiki dirinta ras Gerejanta, kerna penampatta, waktunta pe ( kontribusinta ) nandangi perkembangen kiniteken anak-anakta. Perlu kita jadi usihen i bas erkiniteken man bana. Gelah amin pe kita la ngerana ietehna la lit penalemen sideban seakatan Dibata. Perlu pe iidah anak-anakta maka kita pe metenget nandangi pengaruh negativ arah teknologi si erkembang gundari enda. Kita nggeluh i bas jaman enda, banci adi la kita metenget, kesempaten si lit labo si menangken tapi selaku orangtua talu kita ibanna. Erbage si erlumba i bas kesempaten ( waktu ) enda, si mehuli ras si jahat, si payo ras la bujur. Kuga kita banci mereken usihen si mehuli nandangi anak-anakta?

Tuhu labo perlu si larang ia makesa, sabap lit ka nge dat si mehulina arah perkembangen teknologi. Saja ngenca perlu ka nge iidah anak-anakta enda maka lit si mehulina lit si lahangna. Sabap labo bias pengajarer kerna Kata Dibata si idatken anak-anakta enda i bas ia ku Gereja / Kebaktinna. Kai si ibegina i bas KAKR arus ka nge iidahna i tengah. tengah jabu ( keluarga ). Sabap gegehen pengaruh pengidah asangken pembegi kerna si mehuli.

Pentarlah makeken kesempaten si lit guna mpehuliken jabu kusu mpebelin anak, si jadi `pewaris' kinirajan Dibata. Anak-anak reh belinna bas keluarga, daging kula, biak ( karakter ). I bas jabu me ia ngerancang masa depanna. Guna sie selaku nande berelah waktu ras perhatin man anak-anak alu nikapken suasana bahagia, waktu si mehuli ( quality time ). I bas jaman genduari enda, salah sada si penting selain nandai Dibata eme waktu keluarga.

Diskusi:  

1. Kuga nge kira-kira sibahan maka lit lalap kesempatenta ras anak-anakta? Diskusikenlah enda erpalasken kai si i kataken Petrus i bas ogenta.
2. Sediaken ( rancanglah ) waktu si mehuli man isi jabunta, orangtua ras anak. Subuk i bas jabu bagepe radu ras Moria-KA KR.

Pdt. Phestanta Surbakti, S.Th

Share this post