Tanggungjabab Mamre I Bas Milih Ras Ipilih Selaku Pertua / Diaken - Bahan PA Mamre 24-30 Maret 2019

BIMBINGEN PA MAMRE TANGGAL, 24 - 30 MARET 2019

( TANGGUNGJABAB MAMRE I BAS MILIH RAS IPILIH SELAKU PERTUA / DIAKEN )

O g e n : Perbahanen Rasul-Rasul 14:21-28
Paulus ras Barnabas mulihken ku Antiokia i Siria

21. I Derbe pe iberitaken Paulus ras Barnabas Berita Si Meriah janah nterem ibahanna kalak tek man Jesus. Kenca bage mulihken ia ku Listera, jenari ku Ikoni, janah i Ikoni nari mulihken ia ku Antiokia i Pisidi.

22. I bas tep-tep kuta ipegegehina ukur ajar-ajar janah iajarina gelah tetap ia tek man Tuhan. Nina ngajar, “La banci lang sibentasi lebe erbage-bage kiniseran i bas mengketi Kinirajan Dibata.”
23. I bas tep-tep perpulungen itentuken rasul-rasul e pertua-pertuana. Kenca ertoto man Dibata dingen erpuasa, iendeskenna pertua-pertua e man Tuhan si itekina.
24. Kenca ibentasi rasul si dua kalak e daerah Pisidi, lawes ia ku Propinsi Pampilia.
25. Iberitakenna Kata Dibata i Perge, jenari lawes ia ngincuah ku Atalia.
26. I Atalia nari erlayar ia mulih ku Antiokia; i Antiokia me nai duana ia enggo iendesken ku bas lias ate Dibata guna ndahiken dahin si enggo idungina enda.
27. Kenca seh i Antiokia ipepulungna kalak si enggo tek man Jesus. Iturikenna man perpulungen e kai si enggo ibahan Dibata arah ia. Iturikenna pe kuga enggo icidahken Dibata maka man si labo kalak Jahudi pe pintun kiniteken enggo talang tuhu-tuhu.

28. Paulus ras Barnabas ndekah ringan i je ras perpulungen.

T E M A : Pertua-Diaken Labo Jabaten Tapi Dahin Ngelai.
Tujun : Gelah Mamre

Ngidah maka milih / ipilih jadi Pertua / Diaken e labo masalah jabaten tapi tanggungjabab nehi pendilo Tuhan.
Milih ras ipilih e me tanggungjabab erkiniteken sabab Dibata si mada dahin.

Metode : Lakon Drama

KATA PENARUH
I bas tahun 2019 enda seh ka me paksana gerejanta Gereja Batak Karo Protestan ( GBKP ) milih Pertua ras Diaken si mbaru guna periode 2019-2024. Labo mesunah milih kalak si metunggung jadi serayan Tuhan ( Pertua ras Diaken ) itengah-tengah perpulungen. Guna si e, mulai i bas pertengahen tahun 2018 si lewat, i bas kerina perpulungen enggo ibahan penjemaatan / sosialisasi kerna pemilihen pertua -diaken enda, gelah kerina anggota ngawan meteh, janah nikapken dirina guna ipilih ras pe milih. Bagepe gelah anggota ngawan perpulungen enggo mulai rukur kerna pemilihen e. Bage pe seterusna enggo ka ilakoken pembinaan man anggota ngawan perpulungen arah Buku Setialah No. 27, gelah kerina alu ertanggungjabab nggit milih ras ipilih jadi serayan Tuhan. Janah kerina banci meteh kerna ise si metunggung jadi Pertua ras Diaken, sue ras Pustaka si Badia bagepe Tata Gereja GBKP. Arah sosialisasi ras pembinaan enda iarapken gelah min anggota ngawan lebih dewasa, i bas pemilihen pertua / diaken e.

Alu bage iarapken maka Pemilihen Pertua-Diaken guna periode 2019-2024 lebih erkualitas, ertina kerina anggota ngawan ngelakokenca alu ertanggungjabab man Dibata, bagepe lebih ngergaken ulih pemilihen si ilakoken e. Alu bage, kerina anggota ngawan banci ndukung pelayanen Pertua-Diaken si enggo ipilihna arah persuruhen Dibata.

URAIAN TEKS / TAFSIRAN.
Adi siperdiateken teks enda mulai ayat 21-28, ije teridah lit telu hal si lit i bas perukuren Paulus kerna perpulungen si isiarina, janah kai si iukurkenna idalinkenna pe, e me kap:

Paulus tuhu-tuhu terus terang ras secara jujur ngatakenca man perpulungenna si mbaru jadi Kristen, maka: "La banci lang si bentasi lebe erbage-bage kiniseran i bas mengketi Kerajan Dibata". Jadi kalak Kristen labo hal si mesunah. Kerehen Tuhan Jesus labo erbahanca gelah kegeluhen e mesunah, dem alu perbeben tapi njadiken manusia jadi mehaga.
I bas perdalanenna, ipilihna pertua-pertua i bas teptep perpulungen si idahina, gelah kenca ia lawes ku ingan sideban enggo lit tetap ije singepkep perpulungen e. Paulus yakin maka kalak Kristen si enggo tek arus nggeluh ersada ras teman sisada kiniteken sideban, nggeluh i bas "persekutuan". Kiniersadan i bas perpulungen i rakut ras i pegegehi arah pendahin pertua-pertua si enggo ipilih erpalasken pertoton perpulungen. Pertua-pertua si enggo ipilih iendesken man Dibata, gelah ipake Dibata jadi serayanNa.
La pernah lit i bas perukuren Paulus ras Bamabas, maka kai si enggo ibahanna i bas pelayanen, e bekas gegehna jine. Labo pernah ia rukur bage. Tapi Dibata nge si erdahin arah ia. Ia alat Dibata saja ngenca. Bage ka min pe pertua-pertua si enggo ipilih jadi peminpin perpulungen.

Syarat-syarat sekalak anggota perpulungen guna ipilih jadi Pertua, ipetangkas Paulus i bas suratna Titus 1:5 bage pe i bas 1 Timotius 4:5. Gelah banci ia jadi usihen janah njagai kiniersadan perpulungen.

APLIKASI - I BAS BENTUK DRAMA:
Mbue pendapat si berbeda kerna pemilihen Pertua-Diaken i bas setiap periode. Tentu saja lit si negatif bagepe si positif. Emaka i bas pengkenai / aplikasi bahan PA Mamre enda icubaken kami ngangkatkenca i bas bentuk drama, lakon entah pe dialog. I bas acara PA-nta sekali enda cubaken ipilih / itentuken 3 kalak si berperan jadi: Calon Pertua / Diaken, Mamre 1 ras Mamre 2. Drama si arah teruh enda banci sikembangken.

Kenca enggo terpilih jadi salah sada calon Pertua-Diaken, ngerana ia ilebe-lebe perpulungen, engkai maka ia nggit ras merincuh jadi Serayan Tuhan i bas perpulungen, nina:
Cl. Pertua/Diaken : Bujur kukataken man banta kerina, erkite-kiteken enggo ipilihndu aku jadi salah sada calon Pertua/Diaken i bas PJJ nta enda nari. Menurut penggejapenku labo aku metunggung jadi serayan Tuhan, labo aku pang situhuna. Tapi biaren ka aku nulak pendilo Tuhan. Menurut pengakapku, perpulungen e me tan ras alat Tuhan guna milih serayanNa. Aku nggit jadi serayanNa, janah kuendesken diringku man baNa guna ipakeNa. Tek aku maka adi tutus ateku, pasti isampati ras iperlengkapiNa aku. Bujur man Tuhan ras man banta kerina.

Kenca si e, pepagina i bas Kede Kopi, ngerana-ngerana dua kalak Mamre kerna pemilihen calon Pertua / Diaken si enggo ilakoken nderbih, bagenda percakapenna:
Mamre 1 : O silih bapa Tami, kuga nge pengakapndu kerna hasil pemilihen calon Pertua / Diaken i bas Pll nta si nderbinai? Aku dah kam buen labo kuakap pas kal si enggo terpilih ah ndai. Madin min ndai tetap saja si ndekah, tapi erkiteken Emeritus ka ia lanai banci pilih ningen ka.

Mamre 2 : Maksudndu silih bapa Rido, calon simbaru kurang denga akapndu tunggungna jadi calon serayan? Bas hal siapai akapndu si teridah kal kekurangenna?

Mamre 1 : Ue silih, labo kuidah lit lebihna asangken kita perpulungen enda. Calon pertua si sada ah ndai dahkam pedas kal usur merawa, bagepe ngerana kenca ia megati la sedap megisa. Memang mejingkat ia, e maka ia sange jadi Ketua Panitia Natalta. Bagepe calon diaken ah ndai, me kurang mejingkat adi jadi diaken? Kurang mediate kuakap. Memang mehuli adi ngerana. Ula kari reh la mejilena perpulungenta enda ateku. Kita si kurang rajin enda, me meriah nge siakap adi iperdiateken. Bage pe, la pe kita aktif, tapi labo ateta ngena adi ipandangi anak kutanta GBKP enda.

Mamre 2 : Payo silih, aku pe kuidah nge siikatakenndu ena. Tapi dah kam labo lit si sempurna. Kerina kalak lit kekurangenna, janah lit ka nge kelebihenna. Bagi nina pepatah, "la lit keluarga si sempurna, la lit orangtua si sempurna, la ka bo lit turang ras seninanta si sempurna". Erkiteken si e perlu kita ngalemi si kurang i bas temanta, bagepe temanta ngalemi kekurangenta. Tuhan pe tangkas man baNa maka calon-calon serayanNa si enggo sipilih, pasti lit kekurangenna. Tapi adi ipake Tuhan ateNa, pasti isampatiNa, iperlengkapiNa guna ndahiken dahinNa. Tapi calon-calon Pertua-Diaken e pe, adi terpilih ia pagi i bas pemilihen Runggun, arus ia berusaha gelah reh mehulina ia, alu meteruk ukur arus idaramina kekurangenna, hal-hal kai saja si arus ipekenana bana.

Mamre 1 : Adi bagena nindu silih, lanai aku beluh. Mbera-mbera isampati Dibata kerina calon-calon si enggo terpilih gelah ngasup meteruk rukur. Aku nggalari tehta sekali enda lih.

Catatan: Adi banci, sipegedang tole, sue ras keadaan perpulungenta masing-masing.

DISKUSI

Arah teks bahan PA-nta sendah ( Perb. 14:23 ), si ipilih perpulungen jadi serayan, kalak si sempurna nge ndia? Entah si lebih mendekati kriteria (bdk. 1 Tim. 3:1-7)? Diskusiken.
Sue ras kemajuan jaman sigundari, me labo cukup Pertua-Diaken bujur saja bagi syarat-syarat i bas Tata Gereja ras 1 Timotius 3:1-7? Me perlu ka nge kita Pertua-Diaken si kreatif gelah pelayanen gerejanta berkembang, ngasup njawab tantangan jaman?

USUL ENDE-ENDEN: