Kebaktian Minggu 24 Maret 2019 GBKP KM 8

MINGGU, 24 MARET 2019
(PASSION IV/OKULI : MATAKU TETAP NARE KU KAM )

Bahan Khotbah :

Invocatio : Masmur 25 : 15

15. Aku tetap nare ku TUHAN nimai penampatNa,
ipulahiNa aku i bas cilaka nari.

Ogen : Kejadin 28 : 10 – 19 ( Tunggal )

Nipi Jakup i Betel
10. Itadingken Jakup Berseba, jenari berkat ia kempak Haran.
11. Nandangi sundut matawari seh ia i bas sada ingan, e maka i je ia erberngi. Medem ia, janah ibantalkenna sada batu.
12. Ernipi ia maka iidahna sada redan pajek i babo doni, ujungna seh ku langit; ku teruh ku das i je malekat.
13. Tedis TUHAN i deherna nina, “Aku kap TUHAN, Dibata Abraham ras Isak. Man bandu ras man kesusurenndu Kubereken taneh inganndu medem enda.
14. Kesusurenndu bali pagi ras abu taneh teremna. Ipebelangna daerahna kempak apai pe. Arah kam ras kesusurenndu kerina bangsa i doni enda ndat pasu-pasu i bas aku nari.
15. Inget lah, Aku ras kam dingen ngkawali kam ku japa pe kam lawes, janah Aku ka pagi maba kam mulih ku taneh enda. La Kutadingken kam seh enggo dung Kulakoken kerina si Kukataken bandu e.”
16. Medak me Jakup, jenari nina, “I jenda kepe TUHAN ; ndai la kueteh maka Ia i jenda!”
17. Mbiar ia nina, “Kebiaren kap ingan enda! Ugapa pe rumah Dibata nge enda; ugapa pe ingan enda pintun si talang kempak surga.”
18. Lampas erpagi-pagi keke Jakup, ibuatna batu si ibantalkenna ndai, ipajekkenna jadi sada tanda peringet-ingeten. Iamburkenna minak saitun ku batu e tandana batu e enggo ipersembahken man Dibata.
19. Ibahanna gelar ingan e Betel. (Ope si e kuta enda igelari kalak, Lus.)

Khotbah : Markus 12 : 1 – 12 ( Tunggal )

Perumpaman kerna si newa kebun anggur
( Mat. 21:33-46; Luk. 20:9-19 )
1. E maka ngerana Jesus man kalak ndai alu perumpaman nina, “Lit me sekalak si nuan anggur ibas jumana. Juma ndai ibidena kelewet, ikurukna lubang erbahan bak ingan mereh buah anggur, janah ipajekkenna sada menara ingan erjaga. Kenca bage isewakenna kebun ndai man kalak si newa,
2. jenari lawes ia ku negeri si deban. Kenca seh paksa peranin buah anggur, isuruhna sekalak juak-juakna ndahi si newa kebun anggur ndai, guna mindo sikerajangenna.
3. Tapi itangkap si newa kebun e juak-juak ndai, ipekpekina, isuruhna mulih alu la maba kai pe.
4. E maka isuruh si empu kebun anggur ndai ka sekalak juak-juak si deban. E pe ipekpekina seh luka takalna janah igombang-gombangina pe.
5. Isuruh si empu kebun anggur ndai ka sekalak juak-juak si deban, janah ibunuh kalak ndai ka. Nterem juak-juak si deban isuruhna pegancih-gancih, tapi e pe ipekpekina janah deba ibunuhna.
6. Sekalak nari ngenca tading ras si empu kebun anggur ndai, e me anakna si ikelengina. Dungna anakna enda pe isuruhna ndahi si newa kebun anggur e nina, ‘Adi anakku enda kusuruh tentu mehangke nge ia.’
7. Tapi nina si newa kebun anggur ndai sapih-sapih ia, ‘Enda kap anak si empu kebun anggur enda. Marilah sibunuh ia, gelah man banta kebun enda.’
8. E maka itangkapna anak si empu kebun anggur e, ibunuhna jenari iambekkenna ku darat kebun.”
9. Jenari nungkun Jesus nina, “Kenca bage kai nge ibahan si empu kebun anggur ndai? Tentu reh ia, janah ibunuhina kerina si newa kebun anggur e, jenari isewakenna kebun anggur e man kalak si deban.
10. Ma enggo kin iogendu ibas Pustaka Si Badia,
‘Batu si iambekken tukang
e kap jadi batu palas.
11. Perbahanen Dibata kap enda,
andiko, jilena lanai kap teralang!’ ”
12. E maka peminpin-peminpin kalak Jahudi ndarami dalan guna nangkap Jesus, sabap ietehna maka ia kap si imaksud Jesus ibas perumpaman e. Tapi perbahan mbiar ia ngenehen jelma si nterem, e maka lawes ia, itadingkenna Jesus.