Ngikutken Undang-Undang Tuhan

BAHAN BIMBINGAN PA MAMRE
TANGGAL, 09 - 15 AGUSTUS 2026
( P2P MAMRE : Manfaat/ Kewajiban)

Ogen : Ulangan 10: 12 - 16

Tuntuten TUHAN
12. “Genduari o, bangsa Israel, begikenlah kai si ituntut TUHAN Dibatandu man bandu: Sembah lah TUHAN; dahiken kerina si iperentahkenNa. Kelengi lah IA; dahi lah dahinNa alu bulat ukurndu,
13. dingen ikutken kerina undang-undangNa. Kubereken undang-undangNa man bandu sendah tama kesangapen man bandu.
14. Langit si meganjangna kal pe TUHAN empuna. Doni ras kerina isina pe TUHAN kap empuna.
15. Tapi mbelin kal kekelengen TUHAN man nini-ninindu, e maka ipilihNa kam i bas kerina bangsa-bangsa nari; janah seh asa genduari pe kam tetap denga bangsa pilihenNa.
16. E maka mulai genduari nari, erkemalangenlah man TUHAN olanai mekeng.

Tema : Ngikutken Undang-Undang Tuhan

Tujuan : Gelah Mamre :
1) Matuhi ras ngikutken undang-undang sue ras teks
2) Matuhi P2P eme patron ibas ngaturken pelayanen, bermusyawarah dingen pe berorganisasi

Metode : Diskusi

I. KATA PENARUH
Adi ngerana kita kerna organisasi umumna lit anggaran dasar ras anggaren rumah tanggana sebagai dasar oraganisasi e ibentuk, kai tujunna , kai hak ras kewajiben anggota e ibentuk, kai tujunna , kai hak ras kewajiben anggota organisasi e. Sienda berlaku man kerina anggotana. Anggaran dasar ras anggaren rumah tangga enda me jadi gelemen man kerina anggota bagepe pengurus ibas beraktifitas gelah kai sijadi tujun organisasi e ilitken banci tersehi.
Ibas gerejanta GBKP salah sada organisasi kategorial si lit eme Mamre ( Persadan Perbapan ) Mamre ilitken alu tujun gelah Perbapan GBKP banci ikut muat bagin ibas dahin dahin gerejanta bagepe arah organisasi Mamre enda maka perbapan GBKP banci semakin bertumbuh kiniteken si icidahken arah motto Mamre " Erdiate ras Erpemere". Sebagai organisasi perbapan maka I bas Lembaga Mamre enda pe iperluken P2P ( Pokok-Pokok Peraturen) Mamre sijadi palas man mamre ibas i bas menggeraken organisasi mamre. Arah PA mamre sekali enda ibabai kita guna ngidah uga pentingna bagepe manfaat maka ilitken P2P Mamre gelah radu ras kita ndalankennca.

II. URAIAN TEKS
   Kitab Ulangen 10:12-16 sijadi bahan PA Mamrenta sekali enda i latari belakangi Musa ngaloken 10 pedah Dibata guna ipeseh man kalak Israel ( Ulangen 10:1-11). Arah sepluh pedah Dibata enda icidahken kerna uga kalak Israel ncidahken kinitekenna i bas Relasi ras Dibata ( pedah 1-4) bagepe relasi sapih-sapih mannusia ( Pedah 6-10).
   Ayat 12-13, enda merupaken sada penegasen maka undang-undang Tuhan e sada kewajiben merupaken tuntuten si la banci lang arus idalanken kalak Isarel. Sebagai kewajiben arus idahiken la lit pilihen ras kekecualiaan i bas ndalankenca. Kerina kalak bayak entah musil, dilaki entah diberu, metua entah nguda rsd seri kewajibenna guna ndalankenca. Kerina undang-undang Dibata e seri nilaina la banci ipilih-pilihi guna idalanken. Piga piga si isingetken ibas undang enda si la banci lang arus idalanaken kalak Israel eme : Nembah man Dibata sisada ngenca, penembahen man Dibata teridah arah kegeluhen si ndahiken kerina si iperentahken Tuhan alu bulat ukur ras engkelengi Tuhan siicidahken arah cara geluhna.
   Ayat 14, kita arus patuh man perentah Tuhan erkiteken Ia kap si mada doni ras kerina isina. Lalit si terganjengen asangken Tuhan sebab langit simenganjangna pe Ia si empuna. Ijenda icidahken otoritas Dibata Si Mada Kuasa janah kerina arus matuhi kai iiperentahkenNa. Ayat 15, Aminna Dibata si Mada kuasa ras kerina arus matuhi perentahNa tapi kerina si e ilakoken Dibata guna ncindahken tanda keleng atena man kalak Israel siipilihNa jadi bangsa pilihen. Sebagai bangsa pilihen kalak Israel ndatken tugas ndalanken Misi Dibata. Gelah kalak Israel banci fokus ndalanken si e maka la banci lang arus ipatuhina perentah Tuhan alu bulat ukur.
   Ayat 16, Kepatuhen man perentah Dibata arus ilakoken segera la banci i tunda - tunda, Kepatuhen man perentah Dibata tandana kita erkemalangen man baNa janah tuhu - tuhu patuh ngikutken kerina sura - sura Tuhan gelah ula kita la erbana bana , la mekeng man katanken.

III. PENGKENAINA
Pokok-Pokok Peraturen Mamre ( P2P Mamre) ilitken guna kiniulin organisasi Mamre bagepe anggota Mamre. Arah P2P Mamre kerina aktifitas ras kegeluhen Mamre semakin terarah guna ndalanken Misi Dibata. P2P Mamre mabai kita guna ula kita erbana-bana. Ibas P2P Mamre enggo iaturken kerna litna iuren anggota Mamre guna mendukung kegiaten Mamre Runggun, Klasis ras Pusat. Alu bagi kerina anggota Mamre oratna ertanggung jawab guna nehken iuren anggota Mamre tiap bulan atau pertahun sekaligus. Bagepe ibas bidang organisasi Mamre lit 3 dahin siarus iadahiken Mamre eme bidang Persekutuan, kesaksian ras diakonia. arah telu bidang enda iturunken me ku program kerja sincidahken kerna keterlibaten Mamre ibas dahin itengah-tengah gerejanta.
Pokok-Pokok Peraturen Mamre ( P2P Mamre) enda ilitken ibas Mupel Mamre, alu bage adi lit perubahen kerna P2P Mamre enda maka sie banci saja ilakoken i bas Mupel Mamre. Selama lenga lit perubahen tentu kita arus komitmen ras konsisten guna ndalankenca gelah perdalinen Mamrenta banci terukur ras teridah perkembangenna. Kepatuhen nandangi P2P Mamre seh kal perluna mabai kita kubas kiniraturen, disiplin ,ras la erbanca kita erbana-bana.

VI. DISKUSI
1. Engkai maka Dibata erkelang-kelangken Musa merentahken kalak Israel guna segera matuhi undang Tuhan simerupaken sada tuntuten si mutlak arus idalanken ?
2. Bereken contoh pelaksanaan P2P Mamre si enggo idalankenndu sebagai anggota Mamre bagepe Lembaga Mamre I bas wilayah sektor, runggun; Klasis entahpe Pusat !

USULEN ENDE-ENDEN :
1) KEE GBKP No 338:1,3 ( KLIK JUDUL LAGU UNTUK MELIHAT LIRIK TEKS )
2) KEE GBKP No 201:1,3 ( KLIK JUDUL LAGU UNTUK MELIHAT LIRIK TEKS )
3) KEE GBKP No 9:1,2 ( KLIK JUDUL LAGU UNTUK MELIHAT LIRIK TEKS )
4) KEE GBKP No 334:1 ( Persembahen ) ( KLIK JUDUL LAGU UNTUK MELIHAT LIRIK TEKS )

Pdt. Rehpelita Ginting

HP/WA : 0812 9391 004