Tutus I Bas Si Kitik - Ngergaken Si Kitik ( Bahan PA Moria 29 September - 5 Oktober )

Bahan Bimbingen PA Moria 29 September - 5 Oktober 2019

Ngergaken Si Kitik

SI MAN OGEN : Lukas 16:10-14

Tutuslah i bas si kitik
10. “Ise pe situtus i bas si kitik, tentu tutus pe ia i bas si mbelin; ise si la bujur i bas si kitik, tentu pe la ia bujur i bas si mbelin.
11. Dage, adi la kam tutus i bas erta doni, labo ibereken man bandu erta si tuhu-tuhu.
12. Janah adi la kam terteki nandangi sikerajangen kalak ise nge si nggit mereken ertandu jine man bandu?
13. Labo mungkin sekalak juak-juak dua tuanna. Sabap adi bage ugapa pe nembeh atena nandangi si sekalak, janah si sekalak nari ikelengina; sekalak ihamatina janah sekalak nari igombangina. Kam la banci erkeleng ate man Dibata janah erngena ate man erta doni enda.”
14. Kerina si ikataken Jesus e ibegi kalak Parisi; perbahan ia rangap nandangi duit, e maka icacina Jesus.
15. Tapi nina Jesus man bana, “Kam pekulah-kulahndu bujur i lebe-lebe jelma si nterem, tapi ieteh Dibata nge isi pusuhndu. Sabap kai si meherga iakap manusia la kap lit ergana i bas Dibata.”

TEMA : TUTUS I BAS SI KITIK

T U J U N : Gelah Moria:

Ngangkai pengajaren Jesus maka ketutusen i bas si kitik mabai ndatken si terbelinen.
Nggit ngergaken ras makeken potensi si kitik i bas erusaha.

METODE PA : Ndarami ras nuriken biografi / kisah kalak si sukses si mulai i bas usaha si kitik ras nobar.

Kata Penaruh.
Ketutusen eme sada biak si seh kal perluna i bas sekalak jelma. Sabap e mbelin ngaruhna i bas kesuksesen. Lit sada riset si ilakoken sekitar 20 tahun si lewat i Florida State University nuriken maka kunci sukses eme tutus dingen megenggeng i bas erdahin. Sekalak psikolog asal Amerika si tergelar K. Anders Ericsson ngelakoken observasi man mahasiswa fakultas musik jurusan biola. Ikawitkenna prestasi mahasiswa ras kuga buena waktu si ipakena guna latihen. Mahasiswa si tutus dingen megenggeng bas Iatihen, si ndatken ulih si mehulina. Pemain biola terbaik kerikenna waktu guna latihen la kurang 10.000 jam. Si biasa-biasa saja kerikenna waktu latihen selama 8.000 jam, si kurang mahir kerikenna waktu latihen 5.000 jam ngenca, si la tutus atena latihen la rulih. Ketutusen eme modal utama guna sukses.

Mpebagesi Pengangkan Kerna Ogen.
I bas ogenta Lukas 16:10-14 nerusken pengajaren Jesus kerna perumpaman bendahara si cerdik ( Lukas 16:1-9 ) man ajar-ajarNa, maka kerangapen nandangi erta doni eme Mamon. Kata Mamon asalna i bas bahasa Kasdim, si ertina "rumah erta benda" "kinibayaken". I bas Jesus, persoalen kinibayaken doni eme perkara kitik. Janah dikune lit jelma si la tutus ate i bas perkara kitik, maka ia pe la tutus i bas perkara si mbelin. Ise si la bujur i bas si kitik, tentu pe la ia bujur i bas si mbelin ( ayat 10 ). Perkara mbelin ngerana kerna kiniteken / eme kegeluhen si rasa lalap i bas Kristus. Kinibayaken doni labo jaminen mereken kemalemen ate, la mereken kegeluhen si rasa lalap i bas Kristus. Kerina hal si la mereken kemalemen ate kentisik ngenca. Dage, adi kita la tutus i bas erta doni, labo ibereken man banta erta si tuhu-tuhu ( ayat 11 ). Ngerana kerna erta doni labo salah Si salah eme adi cara ngelitkensa ras cara makekensa la bagi sura-sura Dibata. Tutus i bas si kitik ertina ertanggungjabab bas ndahikensa, dingen makekensa alu tepat ras bujur.

Pengkenaina
Kinibayaken banci jadi pasu-pasu, adi ipakeken alu tutus ras bujur, erguna man kalak sideban. Kinibayaken banci ka jadi maraklesa adi ipake nehi sura-sura daging ras la pernah ngataken bujur. Tutus i bas si kitik, enda me tema si jadi perenungen janah dalanta erlajar ras-ras. I bas kita ngaloken erta doni si rehna bas Dibata nari, pakekenlah alu payo, tutus ras bujur. Janah i bas masana pagi banci ka kita ipercayaken guna ngaloken erta si tuhu-tuhu i bas Kristus. Em maksud Jesus maka ketutusen i bas si kitik mabai ndatken si terbelinen.

Si jadi perayakenta, eme segelah kerina Moria pentar makeken peluang ras waktu si lit. Rikut pe si pake jiwa entrepreunership ( kewirausahan ) si kin enggo gel-gel nari lit i bas kita. Sabap kita itepa Dibata bagi rupa Dibata, si iberekenNa man banta pemeteh ras kengasupen ngusahai ras njagai kai si enggo itepa Dibata guna keberlangsungen geluhta ( Band. Kejadin 1-2 ). Kai pe banci iusahaken, kai pe banci ikelola adina kita nggit notokensa ras mbenakensa. Sabap hakekat manusia nggeluh eme guna erdahin. Emaka Moria pentar makeken kai si lit. Umpamana: halamen rumah banci isuan, lanai kita nukur bumbu dapur. Hasil juma banci ikelola, adi lit sinuan tomat i juma, tupung la kena erga tomat, banci ka si bahan jadi saos tomat. Adi lit barang bekas, banci ka ibahan jadi cendra mata ras sideban. Sedekah enda pe enggo melala kreatifitas si ibahan Moria, mari tole si tingkatken. Sitotoken kai ateta sidatanken, janah dalanken kai si enggo sitotoken e. Amin pe kitik kengasupenta ( potensi ), ergaken ras pakekenlah gelah banci mereken ulih si mehuli man banta bage pe man sekelewetta. Perlu si eteh kangasupenta e rehna bas Dibata nari.

Ndarami Ras Nuriken Biografi / Kisah Kalak Si Sukses Si Menaken I Bas Usaha Si Kitik.
I bas PA Moria wari enda, ibagi Moria i bas kelompok kitik (3-4 kelompok): rnaka pepulung ras daftarken i bas kolom i teruh enda, gelar-gelar si sukses si ibenaken ( si berkarya ) i bas usaha kitik janah turiken secara singkat biografi / kisahna.