Radikalisme Agama - Erberita Alu Kekelengen ( Bahan Bimbingen PA Mamre 15 - 21 September 2019 )

Bahan Bimbingen PA Mamre 15 - 21 September 2019

Radikalisme Agama

Ogen : Perbahanen Rasul - Rasul 9 : 1 - 9

Saul ngaku maka Jesus Tuhan kap
(Perb. 22:6-16, 26:12-18)
1. Tapi Saul tetap niksai dingen munuhi ajar-ajar Tuhan. Idahina Imam si Mbelin,
2. janah ipindona surat kuasa guna ibabana man pengulu rumah pertoton i Damaskus. Gelah adi jumpa ia ras kalak si ngikutken Tuhan i Damaskus, subuk dilaki bage pe diberu banci itangkapna janah ibabana ku Jerusalem.
3. I bas perdalanen ku Damaskus, asum ia enggo ndeher ku kuta e, rempet terang i langit nari ersinalsal engkeleweti ia.
4. Perbahan si e ndabuh ia ku taneh janah ibegina sora erlebuh, “O Saul, Saul, ngkai maka iayakindu Aku?”
5. Ngaloi Saul, “Ise kin Kam Tuhan?”
Erjabap Tuhan, “Aku kap Jesus si iayakindu.
6. Bage gia, kekekenlah janah teruskenlah ku bas kuta. I jah kari lit si ngatakenca man bandu kai si arus ibahanndu.”
7. Sengget kal teman-teman Saul si ikut ras ia i bas perdalanenna. Lanai ia ngasup ngerana sabap ibegina sora, tapi la idahna si ngerana e.
8. Tedis Saul, imedakkenna matana, tapi kai pe la idahna. Perbahan si e itegu kalak ndai Saul ku Damaskus.
9. Telu wari dekahna Saul la erpengidah, janah i bas si telu wari e la ia man ntah pe minem.

Tema : Erberita Alu Kekelengen.

Tujun : Gelah Mamre

Meteh maka la ngena ate Dibata cara-cara kekerasan.
Erkiniteken alu payo si teridah arah sikap toleransi ras kekelengen labo kekerasan.

KATA PENARUH
Radikalisme eme paham atau aliran yang menginginkan perubahan atau pembaharuan sosial dan politik dengan cara kekerasan atau drastis (nen = kamus besar bahasa Indonesia). Inti radikalisme eme perbahanen sesekalak jelma ntah kelompok siatena lit perubahan alu pedas alu makeken kekerasan tapi bertentangan ras nilai-nilai budaya, sosial ntah hukum siberlaku. Bagepe gelah lit perubahan alu pedas, sesekalak jelma ntah kelompok e banci makeken cara kai pe gelah seh sura-surana. Si enda banci terjadi i bas kerina bagin kegeluhenta, subuk i bas kegeluhen sekuler bage pe i bas kegeluhen kerohanian. Ciri-ciri radikalisme ( ikutip i bas internet ) :

Tanggapan pada kondisi yang sedang terjadi diwujudkan dalam bentuk evaluasi, penolakan, bahkan perlawanan dengan keras.
Melakukan upaya penolakan terus menerus dan menuntut perubahan drastis yang diinginkan terjadi.
Orang-orang yang menganut paham radikalisme biasanya memiliki keyakinan yang kuat terhadap program yang ingin mereka jalankan.
Penganut radikalisme tidak segan-segan menggunakan cara kekerasan dalam mewujudkan keinginan mereka.
Penganut radikalisme memiliki anggapan bahwa semua pihak yang berbeda pandangan dengannya adalah bersalah.

Lit enem faktor penyebab terjadi radikalisme e sendiri eme 1).Faktor pemikiran. 2). Paktor ekonomi. 3). Faktor politik. 4). Faktor sosial. 5). Faktor psikologi. 6). Faktor pendidikan.

Rikutken kondisi si terjadi i Negara nta Indonesia enda, radikalisme nggeluh pe i bas agama. Emaka lit kelompok agama siakapna benar janah agama si deban lang, erkiteken sie me lit peminpin salah sada agama mereken paham radikalisme guna membenci ras menolak agama si deban berkembang. Bagepe lit salah sada kelompok simengatasnamakan agama tertentu guna munuh pengikut-pengikut agama si deban, khususna Kristen. Banci pe seh ku mencuci otak gelah nggit ia munuh.

URAIAN TEKS / TAFSIREN
I bas perkembangen kalak si tek man Jesus Kristus terjadi me kekerasan ras penyiksaan i Jerusalem, erkiteken si e me kiam kalak si tek i Jerusalem nari ku kuta-kuta isekelewet Jerusalem.

Paulus ope tek man Jesus Kristus, sekalak si ipercayaken imam-imam si mbelin ras Sahendrin ( Mahkamah Agama ) guna ngayaki, nyiksa, menjaraken ras munuh kalak si tek man Jesus Kristus ( pengikut Jesus Kristus ). Erkiteken sie iayaki Saul kalak si tek man Jesus Kristus seh ku Damaskus. Enda ilakoken Saul sebab nembeh kal ate kalak Jahudi, guru-guru agama, imam-imam simbelin ras peminpin-peminpin kalak Jahudi man Jesus Kristus. Bage pe erkiteken kefanatikan Saul nandangi agama Jahudi emaka kalak si deban ianggapna musuh. Si e terjadi bas diri Saul erkiteken kitik-kitik nari ia nggo iajarken kerna tradisi-tradisi umat Jahudi alu ratur i sinagoge ( rumah pertoton ) janah si la seri ras sie ianggapna imbang. Bagepe lit sura-sura Orangtuana gelah Saul jadi guru agama. Perlu siteh guru Saul e me Gamaliel ( Perb. Rasul 22:3 ). Erkite-kiteken kepentaren Saul, maka i bas angkatenna ia jadi siterkemuka ( terpandai ), emaka adi lit pengikut Kristus ( kalak kristen ) i adili i Sahendrin ( Mahkamah agama ), Saul pe i je ras banci ia ngerana mereken masukan. Lebih asangken sie, Saul menjadi peminpin guna "menumpas" pengikut Kristus. Emaka i bas kuasa si lit bas Saul pengikut Kristus ipaksakenna gelah "menyangkal" kinitekenna ntah pe nadingken kinitekenna, ula nari tek man Jesus Kristus. Adi la nggit maka isiksa, ipenjarakan ras ibunuh. Tapi amin gia lit nembeh ate, kekerasen, peniksan man pengikut Kristus, pengikut Kristus la ngelawan, tapi ielakkena jumpa ras Saul ras tetap ncidahken keleng ate man temanna isekelewetna atan pe man musuhna. Kuasa Sahendrin megegeh kal erkite-kiteken pemerintah Romawi mereken kepercayaan man Sahendrin guna ngurusi kegeluhen agama i Jerusalem. Bagepe pemerintah ngakui Agama Jahudi.

I bas kuasa ras nembeh ate Saul nandangi pengikut Kristus, begi na lit perkembangan Pengikut Kristus i Damaskus, emaka berkat me Saul ku Damaskus. Tapi i bas perdalanenna, Saul ndatken pengenehen e me jumpa ia ras Jesus Kristus. Janah i je Jesus ngerana man bana, ipetandakan Jesus ise situhuna diriNa. Nina Jesus,"Aku me si i ayakindu". Tuhu teridah kiniersadan Jesus ras pengikutna. Pengikut Kristus i bas Jesus, ras Jesus i bas pengikut Kristus, bagepe adi pengikut-pengikut Kristus tetap ngkelengi IA arah perbahanen-perbahanen simehuli, maka ikelengiNa ia kerina (bdk. Joh. 15:1-10). Alu bage perbahanen-perbahanen peminpin-peminpin kalak Jahudi nandangi pengikut Kristus situhuna perbahanen nandangi Jesus Kristus sendiri. Nembeh ate, kekerasen siilakoken peminpin-peminpin agama Jahudi situhuna erkiteken nembeh atena nandangi Jesus Kristus e.

Gegeh ras kuasa Saul ras teman-temanna la ngasup naluken kuasa Tuhan Jesus Kristus e. Saul ndabuh ku taneh, janah teman-temanna sengget, ibegina sora, tapi ise singerana la idahna. Kenca dung Jesus ngerana, mata Saul lanai erpengidah, emaka iteguh teman-temana seh ku Damaskus. Je nari me Saul jera (bertobat) ras jadi pengikut Kristus, jadi rasul. Erkiteken si e gelarna lanai Saul tapi Paulus. Kenca jera, iberitakenna Berita si Meriah man jelma sinterem. Tuhu-tuhu terjadi perubahan 180 derajat man diri Paulus. Kalak situhu-tuhu ernembeh ate man pengikut Kristus, dungna jadi kalak sierkeleng ate man pengikut Kristus. Ibela Paulus ise saja siatena menindas kalak Kristen, termasuk penindasen i bas ajaren.

APLIKASI
Si idah genduari radikalisme nggeluh i bas masyarakat bagepe i bas agama. Radikalisme berkembang erkiteken radikalisme banci saja memecahkan persadan si lit, sebab lit kebencian ras kekerasan si nggeluh sierbahan kalak si deban terpengaruh guna mbalas kejahatan siilakoken kalak si deban. Sipasti radikalisme ula min nggeluh i bas gereja. Kita selaku kalak Kristen nggo iajarken ras i dewasaken i bas pengajaren Jesus Kristus, khususna kerna kekelengen. Ula balas kejahatan alu kejahatan. Ngatakenca Jesus la pernah ngajari kita kerna kekerasen. Jadi la ngena ate Tuhan kerna kekerasen. Tuhu lit denga agama si deban siernembeh ate man banta, tapi apakah kita harus ikut ernembeh ate man agama e, tentu lang. Nembeh ate ula sibalas alu nembeh ate tapi alu keleng ate. Alu bage kita ipasu-pasu Tuhan. Ngena ate Tuhan man banta. Sekali enda kita ngerana kerna erberita alu kekelengen ( tema ). Perlu siteh kekelengen e me karakter kalak Kristen. Bage pe kita idilo guna meritaken Berita Si Meriah gelah doni enda tek man Jesus Kristus. Melala model kita nehken Berita Si Meriah. Tapi model sekali enda eme "Erberita alu Kekelengen". Emaka sipaling utama man banta e me keleng ate Kristus nggeluh min bas kita. Bagepe hukum kekelengen si lit i bas Matius 22:37-40 nggeluh min bas kita. Adi nggeluh kita bagi siikataken i datas ndai maka lit kasabaren man banta, bagepe la ateta mpraktekken radikalisme i bas kegeluhenta tep-tep wari termasuk i bas ergereja. Praktek er Berita si Meriah alu kekelengen e teridah arah la lit perukuren erciga ate bas kita janah nggit kita nampati kalak si deban termasuk si la sada agamanta, bagepe nggit kita erteman ras kalak si deban alu mehuli, bagepe nggeluh kita sikeleng-kelengen ras sisampat-sampaten sapih-sapih kita manusia, khususna kita kristen emaka ngena temanta si deban man banta ( bdk.Perb. Rasul 4:32-35 )
.
DISKUSI