Bimbingen PA Mamre 3-9 Maret 2019, Berwirausaha Dalam Meningkatkan Ekonomi

Bahan PA Mamre 3-9 Maret 2019

( ETOS KERJA )

( Berwirausaha dalam Meningkatkan Ekonomi )

Ogen  : Epesus 2:8-10

8. Sabap erkiteken lias ate Dibata nge maka kam enggo terkelin, erkiteken tek kam man Kristus. Labo bekas perbahanenndu, tapi pemere Dibata kap e. 
9. Labo ulih pendahinndu e, e maka labo lit dalanna ise pe muji bana. 
10. Tinepa Dibata kap kita; i bas persadanta ras Kristus Jesus, ijadikenNa kita guna ndahiken dahin-dahin si mehuli si enggo leben irencanakenNa, gelah sidahiken e.

Tema  : Erdahin Eme Amanah Dibata
Tujun  : Gelah Mamre

• Meteh maka erdahin e merupaken pendilo Dibata (erdahin eme ibadah, amanah/mandataris Dibata). 
• Ndahiken pendahinna alu tutus.

Metode : Sharing

KATA PENARUH
Erdahin man manusia labo sekedar cari makan saja ngenca, tapi erdahin e merupaken cara man manusia lako nuduhken ise kin ia situhuna. Janah terbagesen asangken sie, erdahin e merupaken respon manusia nandangi kerina pemere si enggo isehken Dibata ku bas tengah-tengah kegeluhenna. Alu kata si deban maka erdahin e merupaken bagin kiniteken manusia. Hal si enda me si megati lanai isaksiken manusia bas kegeluhenna. Seh maka i bas ia ndahiken dahinna lanai bo ipakekenna gegeh Dibata arah pertotonna. Tapi cenderung ia makeken kengasupen si lit i bas dirina. Perukuren si bage labo mpeturah biak ngataken bujur, tapi mpeturah biak kesombongen diri ngenca. 

URAIAN TEKS /TAFSIRAN
Sada hal si penting si arus inget manusia i bas geluhna eme kap keterkelinen si rehna i bas lias ras perkuah ate Dibata nari. Hal si enda isaksiken Paulus maka keterkelinen e sebage pemere Dibata si mbelin man manusia. Sabap labo lit ije peran kinibeluhen ras kiningasupen manusia. Si teridah eme kegeluhen manusia si enggo dem alu dosa, si ngiket manusia seh maka lanai ia ngasup mulahi dirina i bas dosa nari. Erkiteken sie me Dibata nehken tanda keleng ate arah perkuah ateNa man manusia. Enda me si ikataken sebage "teologi anugerah", sabap kerina kegeluhen manusia enda iaiokenna sebage sada pemere si mbelin si ibereken Dibata man bana. Kinierdosan lanal ngasup maba manusia pulah i bas biak dosa nari. Alu bage tangkas maka keterkelinen e labo erkiteken usaha ras pendahin manusia, tapi justru keterkelinen e sebage pendahin ras pemere Dibata. 

Ipetangkas Paulus pe tole maka mbelin kal kinilangasupen manusia e. Manusia arus nggejapken maka labo lit dalan guna mpebelin bana. Kalak si nggejapken ia nggeluh iteruh perkuah ate Dibata, tentu labo iagahkenna dirina. Tapi iakukenna maka ia labo kai pe asangken Dibata. Emaka la banci lang tep-tep manusia arus nge ndalanken kegeluhenna guna mpermuliaken Dibata. Hal si enda me si arus teridah i bas perbahanen si ilakoken manusia i bas geluhna. Em tandana maka kegeluhen e enggo jadi tanda pengataken bujur man Dibata. Ertina maka kegeluhen e merupaken respon manusia si dem alu keriahen ukur. Sabap enggo ialokenna keterkelinen si ibereken Dibata man bana. Alu bage, perkuah ate Dibata e arus nge jadi palas manusia ngelakoken perbahanen ras pendahin si mehuli i bas geluhna. 

I bas kitab Kejadin 1:28 ituriken maka erdahin merupaken sada perentah Dibata man manusia. Dibata nepa manusia gelah ngasup encidahken kuasa ras kemuliaan Dibata man doni enda. Enda tentu hak mendasar si lit i bas manusia. Emaka tep-tep jelma ngaloken pendilo Dibata gelahna banci ndahiken dahinna i bas doni enda. Pendilo Dibata e ngajuk manusia nggeluh alu mehuli ras bujur. Emaka labo terjeng bas kegeluhen kiniteken saja ngenca, tapi pe teridah ka i bas pendahin si ilakokenna bas doni enda. Ertina maka tep-tep jelma arus sadar maka kerina si idahikenna e pe bagin kinitekenna. Alu bage, lit kaiten si cukup erat antara kiniteken ras pendahin. Kalak si ngergaken pendilo Dibata man bana, iergakenna pe pendahin si ilakokenna bas geluhna. 

Ipetangkas Paulus maka kalak si nggeluh ersada ras Kristus, njadiken manusia ndahiken dahin-dahin si mehuli i bas doni enda. Maksud Paulus ijenda maka tep-tep kalak si erkiniteken si makeken Kristus jadi palas kegeluhenna, arus jadi usihen man kalak si deban. Sebab si ilakokenna lanai bo perbahanen-perbahanen si la mehuli, tapi si mehuli ras erguna man manusia terlebih-lebih guna mpermuliaken Dibata. Emaka lanai bo lit obahna kerina pendahin si ilakokenna e, guna Dibata ntah guna manusia. Sabap kerina pendahin e ilakokenna alu dem kiniteken ras erkemalangen man Dibata. Ertina maka isadarina kerina e tujunna guna kiniulin segelah tergejap pe kiniulin Dibata e man kerina manusia. Abineno (sekalak teolog) i bas bukuna ngataken maka keterkelinen ialoken kalak si erkiniteken labo erkiniteken kiniulin perbahanen ntahpe pendahinna, tapi manusia itepa Dibata i bas Kristus guna ngelakoken perbahanen / pendahin si mehuli. Alu bage, man kalak si erkinitiken erdahin e merupaken bagin si la terlepasken ras kinitikenna. Keselamaten (keterkelinen) si ialoken manusia i bas geluhna mpengaruhi orat geluhna. Kalak si enggo nggejapken keselamaten si ibereken Dibata man bana, ituduhkenna respon si mehuli rah ketutusenna ndahiken dahinna. Janah kalak si tutus i bas dahin ntahpe usahana, tentu lit ialokenna ulih (untung)-na. Untung si idatna e ipepulungna ka guna jadi modalna. Erkiteken kalak si erkiniteken geluhna pe labo boros, erpoya-poya, emaka kerina senna e ipepulungna ras isusunna jadi modalna guna erdahin. Enda me gambaren etos kerja Calvinisme si paksa sie mengubah perekonomian Eropa Barat jadi berkembang pesat. Emaka piga-piga sosiolog nimpulken maka pengajaren Calvin ikut berperan i bas perkembangen sistem kapitalisme.
 
APLIKASI
Segedang geluh manusia pasti tetap ia erdahin. Emaka la banci lang arus ia tetap erjuang bas geluhna, gelahna arah pendahinna e banci isaksikenna perbahanen Dibata si mbelin si enggo isaksikenna bas geluhna. Hal si enda me si perlu iperdiateken Mamre. Alu arapen maka kerina perbapan (Mamre) i GBKP banci min lit nilai-nilai etos kerja si mehuli i bas ia. I bas tradisi kalak Karo erdahin e rnerupaken hal si penting. Emaka etos kerja kalak Karo pe cukup tinggi, "langa tekuak manuk enggo berkat ku juma, lanai idah ikur babi maka mulih juma nari". E garnbaren maka kalak Karo pe tutus kal atena erdahin. Emaka biak si bagelah si perlu ipeturah Mamre i bas pusuhna.
 

DISKUSI  

1. Diskusikenlah hubungen keterkelinen ( keselematen ) manusia ras pendahin si ilakokenna
2. Kai dage upaya si banci ilakoken Mamre lako nampati Mamre si lenga lit dahinna bagepe Permata si lenga lit dahinna

USULEN ENDE-ENDEN

• KEE GBKP No. 183:1-;      ( Klik Nomor KEE Untuk Melihat Lagu )
• KEE GBKP No. 255:1-4;    ( Klik Nomor KEE Untuk Melihat Lagu )
• KEE GBKP No. 316:1-3;   ( Klik Nomor KEE Untuk Melihat Lagu )
• KEE GBKP No. 386:1-3     ( Klik Nomor KEE Untuk Melihat Lagu )
  
  

Pdt. Dicky A. Bangun, M.Th 

HP. 081263231231

Share this post